អគ្គរដ្ឋអាជ្ញារបស់អ៊ីស្រាអែល បានប្រាប់ឲ្យដឹងថា ជំនួយការរបស់លោកនាយករដ្ឋមន្ត្រីអ៊ីស្រាអែល Benjamin Netanyahu ប្រឈមនឹងការចោទប្រកាន់ផ្លូវការ ពាក់ព័ន្ធនឹងផ្នែកសន្តិសុខ ដោយកំពុងរង់ចាំសវនាការ ជុំវិញបទចោទ ដែលថា បានធ្វើឲ្យបែកធ្លាយព័ត៌មានយោធាសម្ងាត់បំផុត អំឡុងសង្គ្រាមរបស់អ៊ីស្រាអែល នៅតំបន់ហ្កាហ្សា។

តែទីប្រឹក្សាជិតស្និទ្ធរបស់លោក Netanyahu គឺលោក Jonatan Urich បានបដិសេធមិនបានប្រព្រឹត្តខុសអ្វីឡើយ ក្នុងសំណុំរឿង ដែលអាជ្ញាធរផ្លូវច្បាប់ បានចាប់ផ្តើមស៊ើបអង្កេតនៅចុងឆ្នាំ២០២៤។

លោក Netanyahu បានពណ៌នាការស៊ើបអង្កេតលើលោក Urich និងជំនួយការផ្សេងទៀតថា មានហេតុផលនយោបាយ ហើយនៅថ្ងៃចន្ទ (ទី១៤ ខែកក្កដា) នេះ បានលើកឡើងថា លោក Urich មិនបានធ្វើឲ្យប៉ះពាល់ដល់សន្តិសុខរដ្ឋនោះទេ។ មេធាវីរបស់លោក Urich បាននិយាយថា ការចោទប្រកាន់នេះ គឺគ្មានមូលដ្ឋាន ហើយថា ភាពគ្មានទោសពៃរ៍របស់កូនក្តីខ្លួន នឹងត្រូវបានបង្ហាញឲ្យឃើញដោយគ្មានការសង្ស័យឡើយ។

តាមរយៈសេចក្តីថ្លែងការណ៍មួយ កាលពីថ្ងៃអាទិត្យ (ទី១៣ ខែកក្កដា) អគ្គរដ្ឋអាជ្ញា លោកស្រី Gali Baharav-Miara បានឲ្យដឹងថា លោក Urich និងជំនួយការម្នាក់ទៀត បានទាញយកព័ត៌មានសម្ងាត់ពីយោធាអ៊ីស្រាអែល ហើយបានធ្វើបែកធ្លាយទៅសារព័ត៌មានអាល្លឺម៉ង់ Bild។

ហើយលោកស្រីបានបញ្ជាក់ថា ចេតនារបស់ពួកគេ គឺការជះឥទ្ធិពលលើមតិសាធារណៈ ដែលមានចំពោះលោក Netanyahu និងព្យាយាមនិយាយអំពីការសម្លាប់ចំណាប់ថ្នូរអ៊ីស្រាអែលចំនួន ៦នាក់ ដោយអ្នកចាប់ខ្លួនជនជាតិប៉ាឡេស្ទីន នៅហ្កាហ្សា កាលពីចុងខែសីហាឆ្នាំ២០២៤៕