កាហ្សាក់ស្ថាន៖ អ្នកនាំពាក្យអង្គការសហប្រជាជាតិលោក Stephane Dujarric បាននិយាយកាលពីថ្ងៃពុធថា អង្គការសហប្រជាជាតិកំពុងអំពាវនាវឱ្យមេដឹកនាំនយោបាយ និងអ្នកប្រឆាំងនៅក្នុងប្រទេសកាហ្សាក់ស្ថាន អនុវត្តការអត់ធ្មត់ក្នុងពេលមានភាពតានតឹងកើនឡើង និងការតវ៉ានៅក្នុងប្រទេស។ ថ្លែងទៅកាន់អ្នកសារព័ត៌មាននៅទីក្រុងញូវយ៉ក លោក Dujarric បាននិយាយថា អង្គការសហប្រជាជាតិកំពុងតាមដានស្ថានការណ៍នៅក្នុងប្រទេសនេះយ៉ាងដិតដល់។
យោងតាមរបាយការណ៍ថ្មីបានឱ្យដឹងថា ក្រុមអ្នកតវ៉ានៅក្នុងទីក្រុងធំបំផុតរបស់ប្រទេសកាហ្សាក់ស្ថាន បានសម្រុកចូលលំនៅឋានប្រធានាធិបតី និងការិយាល័យអភិបាលក្រុងកាលពីថ្ងៃពុធ ហើយបានដុតបំផ្លាញអគារទាំងពីរនេះ ខណៈដែលបាតុកម្មនេះបណ្តាលមកពីការកើនឡើងនៃតម្លៃប្រេងឥន្ធនៈ នៅក្នុងប្រទេសអាស៊ីកណ្តាលមួយនេះបានកើនឡើងយ៉ាងខ្លាំង។ នគរបាលបានបាញ់ទៅលើបាតុករមួយចំនួននៅវិមានប្រធានាធិបតីមុនពេលរត់គេចខ្លួន។ ពួកគេបានប៉ះទង្គិចម្តងហើយម្តងទៀតជាមួយក្រុមបាតុករក្នុងប៉ុន្មានថ្ងៃថ្មីៗនេះ ដោយដាក់ពង្រាយកាណុងបាញ់ទឹកក្នុងអាកាសធាតុត្រជាក់ និងបាញ់ឧស្ម័នបង្ហូរទឹកភ្នែក។ រដ្ឋាភិបាលបានលាលែងពីតំណែងជាការឆ្លើយតបនឹងភាពវឹកវរ ហើយប្រធានាធិបតីបានប្តេជ្ញាថា នឹងចាត់វិធានការតឹងរ៉ឹងដើម្បីបង្ក្រាបបាតុកម្មនេះ។ អង្គការឃ្លាំមើលពិភពលោក Netblocks បាននិយាយថា ប្រទេសនេះកំពុងជួបប្រទះនឹងការកាត់ផ្តាច់អ៊ីនធឺណិត៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
