ប្រធានអ្នកចរចាររបស់សហភាពអឺរ៉ុបជាមួយសហរដ្ឋអាមេរិកបាននិយាយថា ការគំរាមដំឡើងពន្ធ ៣០% លើទំនិញអឺរ៉ុប នឹងលុបបំបាត់ពាណិជ្ជកម្មឆ្លងអាត្លង់ទិក ស្របពេលកំពុងសម្តែងក្តីសង្ឃឹមថាកិច្ចព្រមព្រៀងមួយនៅតែអាចធ្វើទៅបាន។

លោក Maroš Šefčovič ស្នងការពាណិជ្ជកម្មប្លុកសហភាពអឺរ៉ុប បាននិយាយថា ការដំឡើងពន្ធ៣០% ឬច្រើនជាងនេះនឹងមានផលប៉ះពាល់យ៉ាងខ្លាំង ដែលធ្វើឱ្យ ស្ទើរតែមិនអាចបន្តពាណិជ្ជកម្មឆ្លងអាត្លង់ទិកបច្ចុប្បន្ន ដែលមានទំហំទឹកប្រាក់៤,៤ពាន់លានអឺរ៉ូ ក្នុងមួយថ្ងៃ។

បន្ទាប់ពីកិច្ចពិភាក្សាជាមួយក្រុមរដ្ឋមន្ត្រីពាណិជ្ជកម្មសហភាពអឺរ៉ុបនៅទីក្រុងប្រ៊ុចសែល លោក Šefčovič បាននិយាយថា យើងចង់ប្រើជារៀងរាល់ថ្ងៃ រាល់លទ្ធភាព និងរៀងរាល់នាទីរហូតដល់ថ្ងៃទី ១ ខែសីហា ដើម្បីស្វែងរកដំណោះស្រាយចរចា។ លោកបានបន្តថា អត្រាពន្ធ ៣០% គឺមិនអាចទទួលយកបានជាដាច់ខាត។

នៅក្នុងលិខិតមួយដែលបានចេញផ្សាយលើប្រព័ន្ធផ្សព្វផ្សាយសង្គមកាលពីថ្ងៃសៅរ៍ ប្រធានាធិបតីអាមេរិកបាននិយាយថា ការនាំចូលរបស់សហភាពអឺរ៉ុបនឹងប្រឈមការយកពន្ធ ៣០% ចាប់ពីថ្ងៃទី ១ ខែសីហា ។

ជាការឆ្លើយតបទៅនឹងកាលកំណត់ចុងក្រោយរបស់លោក Trump សហភាពអឺរ៉ុបបានសម្រេចចិត្តពន្យារពេលការដំឡើងពន្ធសងសឹកលើទំនិញអាមេរិកក្នុងទំហំទឹកប្រាក់ ២១ ពាន់លានអឺរ៉ូ ដែលនឹងត្រូវចាប់ផ្តើមនៅពាក់កណ្តាលអធ្រាត្រថ្ងៃចន្ទសប្ដាហ៍នេះ រហូតដល់ថ្ងៃទី ១ ខែសីហា។

ក្រុមរដ្ឋមន្ត្រីក៏បានពិភាក្សាអំពីផែនការសម្រាប់ជុំនៃវិធានការតបតបន្ថែមទៀតផងដែរ ដែលកំណត់គោលដៅនៃការនាំចូលក្នុងទំហំទឹកប្រាក់៧២ ពាន់លានអឺរ៉ូរបស់សហរដ្ឋអាមេរិកទៅកាន់សហភាពអឺរ៉ុប ប៉ុន្តែពុំបានបង្ហាញពីព័ត៌មានលម្អិតនោះទេ យ៉ាងណាក៏ដោយ លោក Trumpនិយាយថា លោកបើកចំហរចំពោះការចរចាពាណិជ្ជកម្មជាមួយអឺរ៉ុប ៕