​វាយ​កូន​បាល់៖ ​ក្រុម​វាយ​កូន​បាល់​អេ​ស្ប៉ា​ញ​បាន​កក់​កៅអី​នៅ​វគ្គ​ពាក់កណ្តាល​ផ្តាច់ព្រ័ត្រ ATP Cup ហើយ​ក្រោយ​ជ័យជំនះ​ចុងក្រោយ​លើ​ក្រុម​ស៊ែ​ប​។ ​កីឡាករ​អេ​ស្ប៉ា​ញ Pablo Cerreno Busta បាន​យកឈ្នះ​កីឡាករ​ស៊ែ​ប Filip Krajinovic ៦-៣ និង ៦-៤ មុនពេល​ដែល Roberto Bautista Agut យកឈ្នះ Dusan Lajovic ៦-១ និង ៦-៤​។

​​មុន​ពេល​អេ​ស្ប៉ា​ញ​ជួប​ស៊ែ​ប​នេះ ​ឈីលី​បាន​យកឈ្នះ​ណ័​រវេ​ស​រួចហើយ​នៅ​ក្នុង​ពូ​ល A នេះ​ដែល​មានន័យថា ​អេ​ស្ប៉ា​ញ​ត្រូវការ​តែមួយ​ពិន្ទុទៀត​ប៉ុណ្ណោះ​ដើម្បី​ឡើង​វគ្គ​បន្ត​។ ​ចំណែក​ពូ​ល D វិញ​ប៉ូឡូញ​ជា​ក្រុម​លេខ ១ ក្នុង​ពូ​ល​ក្រោយ​ជ័យជំនះ​ចុងក្រោយ​លើ​អា​ហ្ស​ង់​ទីន ៣-០ នៅ​ទីក្រុងស៊ីដនី​។ ​​កីឡាករ​ប៉ូឡូញ Kamil Majchrzak បាន​យកឈ្នះ​កីឡាករ​អា​ហ្ស​ង់​ទីន Federico Delbonis ៦-៣ និង ៧-៦(៧-៣) មុនពេល​ដែល Hubert Hurkacz ក៏​យកឈ្នះ Diego Schwartzman ដែរ​ក្នុង​លទ្ធផល ៦-១ និង ៦-៤​។

​​ប្រកួត​បង្គ្រប់​កិច្ច​ចុងក្រោយ​វិញ្ញាសា​វាយ​គូ​ ក្រុម​ប៉ូឡូញ​នៅតែ​បន្ត​យកឈ្នះ​អា​ហ្ស​ង់​ទីន​ទៀត ៧-៦ និង ៧-៦​។ ​ជ័យជំនះ​នេះ​ធ្វើឱ្យ​ប៉ូឡូញ​ជា​ក្រុម​លេខ ១ ក្នុង​ពូ​ល D នេះ​ក្រោយ​ឈ្នះ​ទាំង ៣ប្រកួត​ក្នុង​ពូ​ល​ទៅលើ​អា​ហ្ស​ង់​ទីន ក្រិ​ក និង​ហ្ស​ក​ហ្ស៊ី​។ ​វគ្គ​ពាក់កណ្តាល​ផ្តាច់ព្រ័ត្រ​ក្រុម​លេខ ១ ក្នុង​ពូ​ល D ត្រូវ​ជួប​ជាមួយ​ក្រុម​លេខ ១ ក្នុង​ពូ​ល A គឺ​អេ​ស្ប៉ា​ញ​ ខណៈ​គូប្រកួត​វគ្គ​ពាក់កណ្តាល​ផ្តាច់ព្រ័ត្រ​មួយទៀត​នឹង​រកឃើញ​នៅថ្ងៃនេះ​៕

​អត្ថបទ​៖​នាង សុភា​វុ​ធ