កងកម្លាំងអ៊ីស្រាអែលបានបន្តវាយលុកតំបន់ហ្កាហ្សា ដោយបានវាយប្រហារលើទីផ្សារដ៏មមាញឹកមួយកន្លែងនិងទីតាំងចែកចាយទឹក ដោយបានសម្លាប់ពលរដ្ឋប៉ាឡេស្ទីន ៩៥នាក់។ក្រោយការវាយប្រហារសម្លាប់រង្គាលពីអ៊ីស្រាអែល ពលរដ្ឋហ្កាហ្សាជួបការលំបាកខ្លាំងក្នុងការរស់នៅប្រចាំថ្ងៃដោយពួកគេប្រឈមនឹងការភ័យខ្លាច គ្មានអនាម័យ និងវិបត្តិទឹកកាន់តែធ្ងន់ធ្ងរ ។

ជាក់ស្ដែងបុរសប៉ាឡេស្ទីនជាឪពុកមានកូន៩នាក់ និងប្រពន្ធម្នាក់ Akram Al-Manasra ដែលភៀសខ្លួនពីការទម្លាក់គ្រាប់បែក បានរៀបរាប់ថាបច្ចុប្បន្នពួកលោកកំពុងស្នាក់នៅក្នុងជំរំតង់ក្នុងទីក្រុងហ្កាហ្សា បន្ទាប់ពីភៀសខ្លួនពីស្រុក Shujaiya ហើយគ្រួសាររបស់លោកពិបាករកទឹកស្អាតខ្លាំងណាស់។

លោកបានពន្យល់ថា សូម្បីតែទឹកដែលចាំបាច់សម្រាប់ងូត បោកគក់សម្លៀកបំពាក់ និងលាងចានឆ្នាំងក៏មិនមានរហូតដែរ។ ចំណែកប្រពន្ធរបស់លោកឈ្មោះ Khaled បាននិយាយថាវិបត្តិនេះនាំឱ្យកូនៗរបស់ពួកគេ មានជំងឺនិងការឆ្លងមេរោគ។

ការខ្វះខាតទឹកនៅតំបន់ហ្កាហ្សាកាន់តែធ្ងន់ធ្ងរក្នុងប៉ុន្មានសប្តាហ៍ថ្មីៗនេះ ស្របពេលដែលកង្វះខាតប្រេងឥន្ធនៈបានធ្វើឱ្យកន្លែងចម្រោះទឹកនានា ត្រូវបានបិទ ។

ក្រសួងសុខាភិបាលនៃតំបន់ហ្កាហ្សាបាននិយាយកាលពីថ្ងៃអាទិត្យទី ១៣ ខែកក្កដាថាមនុស្សជាង ៥៨.០០០នាក់ ត្រូវបានសម្លាប់ចាប់តាំងពីការចាប់ផ្តើមសង្គ្រាមរវាងអ៊ីស្រាអែលនិងក្រុមហាម៉ាសកាលពីខែតុលាឆ្នាំ ២០២៣ មក៕