ការខ្វែងគំនិតគ្នាបានផ្ទុះឡើងរវាងរដ្ឋាភិបាលអ៊ីស្រាអែល និងយោធា ជុំវិញការចំណាយ និងផលប៉ះពាល់នៃជំរំដែលបានគ្រោងទុកសម្រាប់ប្រជាជនប៉ាឡេស្ទីននៅក្រុងភាគខាងត្បូង Rafah តំបន់ហ្កាហ្សា ខណៈក្រុមអ្នកនយោបាយបានរិះគន់លោកអតីតនាយករដ្ឋមន្ត្រី Ehud Olmert សម្រាប់ការព្រមានថា គម្រោងនេះនឹងបង្កើតបានជា "ជំរំប្រមូលផ្តុំអ្នកទោស" ប្រសិនបើផែនការដំណើរការទៅមុខ។

គម្រោង "ទីក្រុងមនុស្សធម៌" បានក្លាយជាចំណុចខ្ទាស់មួយក្នុងកិច្ចចរចាបទឈប់បាញ់ជាមួយក្រុមហាម៉ាស។ អ៊ីស្រាអែលចង់ទុកកងទ័ពខ្លួនឱ្យឈរជើងទូទាំងផ្នែកសំខាន់ៗនៃតំបន់ហ្កាហ្សា រួមទាំងក្រុង Rafah នៅភាគខាងត្បូង ដែលរដ្ឋមន្ត្រីការពារជាតិ លោក Israel Katz និយាយថា ជំរំដាក់ជនភៀសខ្លួនមួយនោះនឹងត្រូវសាងសង់ឡើងសម្រាប់អ្នកស្រុកហ្កាហ្សា។

លោក Katz បើកបង្ហាញកាលពីសប្តាហ៍មុនថា លោកបញ្ជាឱ្យកងទ័ពរៀបចំផែនការបង្កើតជំរំមួយ ដែលនៅពេលដំបូងមនុស្ស ៦០ម៉ឺននាក់នឹងផ្លាស់ទៅនៅទីនោះ ហើយទីបំផុតនឹងដាក់ប្រជាជនទាំងមូលរបស់ហ្កាហ្សា។ ផែនការដែលត្រូវរាយការណ៍ថានឹងចាយប្រាក់ដ៏សន្ធឹកសន្ធាប់ពី ២,៧ពាន់លានដុល្លារទៅ ៤ពាន់លានដុល្លារនេះ បង្កការភ្ញាក់ផ្អើលភ្លាមៗក្នុងចំណោមសម្ព័ន្ធមិត្តអ៊ីស្រាអែល រួមទាំងចក្រភពអង់គ្លេស និងការរិះគន់ខ្លាំងៗពីអ្នកនយោបាយក្នុងស្រុកផងដែរ។

លោកអតីតនាយករដ្ឋមន្រ្តី Olmert ដែលដឹកនាំអ៊ីស្រាអែលពីឆ្នាំ២០០៦ ដល់ឆ្នាំ២០០៩ គឺជាអ្នករិះគន់ដ៏លេចធ្លោបំផុតចំពោះគម្រោងរបស់យោធាមួយនេះ។ លោកព្រមានថា ប្រសិនបើជនជាតិប៉ាឡេស្ទីនត្រូវបានបង្ខំឱ្យផ្លាស់ទៅនៅជំរំពិតមែន សកម្មភាពបែបនោះនឹងក្លាយជាការបោសសម្អាតជាតិសាសន៍ដ៏ចម្រូងចម្រាស។ មន្រ្តីជាន់ខ្ពស់អ៊ីស្រាអែលផ្សេងទៀតនិយាយថា ថាប្រសិនបើគម្រោងនេះដំណើរការមែន នោះអ៊ីស្រាអែលនឹងជាអ្នកទទួលបន្ទុកចំណាយស្ទើរតែទាំងស្រុង៕