​វាយ​កូន​បាល់៖ កីឡាករ​វាយ​កូន​បាល់​លេខ ១ ពិភពលោក Novak Djokovic ត្រូវ​បាន​បដិសេធ​មិន​ឱ្យ​ចូល​ប្រទេស​អូស្ត្រាលី ហើយ​ត្រូវ​បាន​លុបចោល​ទិដ្ឋាការបន្ទាប់ពី​បាន​មក​ដល់​ទី​ក្រុង Melbourne កាលពី​ល្ងាច​ថ្ងៃ​ពុធដើម្បី​ការពារ​តំណែង​របស់​ខ្លួន​នៅ​ព្រឹត្តិការណ៍ Grand Slam, Australian Open​។​

​​កងកម្លាំង​អន្តោប្រវេសន៍​អូស្ត្រាលី​បាន​ចេញ​សេចក្ដីថ្លែងការណ៍​មួយ ​នៅ​ព្រឹក​ថ្ងៃ​ព្រហស្បតិ៍ម៉ោង​ក្នុងស្រុក​ដោយ​និយាយ​ថា កីឡាករ​វាយ​កូន​បាល់​សញ្ជាតិ​ស៊ែ​ប​រូប​នេះ​បាន​ផ្តល់​ឯកសារ​មិន​គ្រប់​គ្រាន់​ តម្រូវ​តាម​ការ​ចង់​បាន​ក្នុង​ការ​ចូល​មកកាន់​ទឹកដី​អូស្ត្រាលី​។ កីឡាករ​វ័យ ៣៤​ឆ្នាំ​រូប​នេះ​បាន​មកដល់​អាកាសយានដ្ឋាន​ទីក្រុង Melbourne បន្ទាប់ពី​ទទួល​បាន​ការ​លើក​លែង​ផ្នែក​វេជ្ជសាស្ត្រ​ដោយ​រដ្ឋបាល​រដ្ឋ Victorian ពី​តម្រូវ​ការ​ចាក់​វ៉ាក់សាំង​ដ៏​តឹងរ៉ឹង​សម្រាប់​ការ​ប្រកួត Australian Open ដែល​គេ​ធ្លាប់​ឈ្នះជើងឯក​ដល់​ទៅ ៩​លើក​នៅ​ទីនេះ​។ ប្រព័ន្ធ​ផ្សព្វផ្សាយ​អូស្ត្រាលី​បាន​រាយការណ៍​ថា ​ក្រុម​របស់​លោក Djokovic បាន​ដាក់​ពាក្យសុំ​ខុស​ប្រភេទ​ទិដ្ឋាការ​ដែល​អម​ជាមួយ​ការលើកលែង​ផ្នែក​សុខាភិបាល​។ ​​ថ្លែង​ជាមួយ​ទូរទស្សន៍​អូស្ត្រាលី​ប៉ុស្តិ៍​លេខ៧ រដ្ឋមន្ត្រី​ក្រសួងសុខាភិបាលលោក Greg Hunt បាន​និយាយ​ថា ​ការលើកលែង "​មិន​ត្រូវ​តាម​ស្តង់ដារ​នៃ​ភស្តុតាង​ទៅតាម​ការកំណត់​របស់​អន្តោប្រវេសន៍​អូស្ត្រាលី​"។​

​​មេធាវី​របស់ Djokovic ត្រូវ​បាន​គេ​រំពឹង​ថា​នឹង​ប្តឹង​ឧទ្ធរណ៍​ចំពោះ​ការសម្រេចចិត្ត​នេះ ដែល​បាន​កើត​ឡើង​បន្ទាប់ពី​ជើងឯក Grand Slam ២០​លើក​រូប​នេះ​ត្រូវ​ចំណាយ​ពេល​ជាង ៨ម៉ោង​នៅ​ឯ​អាកាស​យានដ្ឋាន Melbourne Tullamarine ដើម្បី​រង់ចាំ​រកមើល​ថា ​តើ​គាត់​នឹង​ត្រូវ​បាន​អនុញ្ញាត​ឱ្យ​ចូល​ប្រទេស​ដែរ​ឬទេ​។ ​Grand Slam, Australian Open នឹង​ចាប់ផ្តើម​នៅ​ថ្ងៃទី១៧ ខែ​មករា​ឆ្នាំក្រោយ ​ខណៈ​កីឡាករ​នឹង​ចាប់ផ្ដើម​ទៅកាន់​ទឹកដី​អូស្ត្រាលី​បណ្តើរៗ​នៅ​សប្តាហ៍​ក្រោយ​ ដើម្បី​ចូលរួម​ការប្រកួត​កម្ដៅ​សាច់ដុំ​៕

​អត្ថបទ​៖​នាង សុភា​វុ​ធ