ក្រុមសកម្មជនស៊ូដង់ បាននិយាយកាលពីថ្ងៃចន្ទ (១៤ កក្កដា) ថា កងកម្លាំងគាំទ្ររហ័សយោធាប៉ារ៉ា ហៅកាត់ថា RSF បានសម្លាប់មនុស្សជិត ៣០០នាក់ នៅក្នុងការវាយប្រហារមួយក្នុងរដ្ឋ North Kordofan ដែលបានចាប់ផ្តើមកាលពីថ្ងៃសៅរ៍ចុងសប្ដាហ៍មុន។

កងកម្លាំង RSF បាននិងកំពុងប្រយុទ្ធជាមួយកងទ័ពស៊ូដង់នៅក្នុងតំបន់នោះ ដែលជាតំបន់ជួរមុខដ៏សំខាន់មួយនៃសង្គ្រាមស៊ីវិលចាប់តាំងពីខែមេសា ឆ្នាំ២០២៣មក។ កងទ័ពបានកាន់កាប់យ៉ាងរឹងមាំនូវមជ្ឈមណ្ឌល និងភាគខាងកើតនៃប្រទេស ខណៈកងកម្លាំង RSF កំពុងប្រឹងប្រែងពង្រីកការគ្រប់គ្រងរបស់ខ្លួននៅតំបន់ភាគខាងលិច រួមទាំងរដ្ឋ North Kordofan ផងដែរ។

ក្រុមសិទ្ធិមនុស្សនៃមេធាវីសង្គ្រោះបន្ទាន់ បាននិយាយក្នុងសេចក្តីថ្លែងការណ៍មួយកាលពីថ្ងៃចន្ទថា កងកម្លាំង RSF បានវាយឆ្មក់លើភូមិជាច្រើនកាលពីថ្ងៃសៅរ៍ ជុំវិញទីក្រុង Bara ដែលយោធាប៉ារ៉ាមួយនេះគ្រប់គ្រង។ នៅក្នុងភូមិមួយឈ្មោះ Shag Alnom មនុស្សជាង ២០០នាក់ ត្រូវបានសម្លាប់ដោយការដុតទាំងរស់ ឬការបាញ់ប្រហារ។

ក្រុមសកម្មជនបន្តថា ការវាយឆ្មក់ចូលភូមិផ្សេងទៀតបានសម្លាប់ជនស៊ីវិលជិត ៤០នាក់ ខណៈមនុស្សរាប់សិបនាក់ផ្សេងទៀតបានបាត់ខ្លួន។ នៅថ្ងៃបន្ទាប់ ក្រុមនេះបាននិយាយថា ពួក RSF បានវាយប្រហារភូមិ Hilat Hamid បានសម្លាប់មនុស្សជិត ៥០នាក់ រួមទាំងស្ត្រីមានផ្ទៃពោះ និងកុមារផងដែរ ដែលនាំឱ្យតួលេខអ្នកស្លាប់សរុបក្នុងការវាយប្រហារដ៏ឃោរឃៅនេះមានចំនួនជិត ៣០០នាក់៕