មន្ត្រីយោធាអ៊ីស្រាអែល បានទទួលស្គាល់ថា ការវាយប្រហារតាមអាកាសដ៏បង្ហូរឈាមនៅជំរំ Nuseirat តំបន់ហ្កាហ្សាភាគកណ្តាល កាលពីថ្ងៃអាទិត្យ ថាជា «កំហុស»។ អាជ្ញាធរតំបន់បានប្រកាសថា មនុស្ស១២នាក់ក្នុងនោះមានកុមារ៨នាក់ត្រូវបានសម្លាប់នៅចំណុចចែកចាយទឹក។

អ្នកនាំពាក្យកងកម្លាំងការពារអ៊ីស្រាអែល(IDF)បានប្រាប់ប្រព័ន្ធផ្សព្វផ្សាយ NHK កាលពីថ្ងៃចន្ទថា ការវាយប្រហារតាមអាកាសបានកំណត់គោលដៅលើអ្នកដែលកងកម្លាំង IDF អះអាងថាជា «ភេរវករក្រុមជីហាតអ៊ីស្លាមនិយម»។ ពួកគេនិយាយថា «កំហុសបច្ចេកទេស» បានបណ្តាលឱ្យគ្រាប់ផ្លោងធ្លាក់ចុះក្នុងចម្ងាយ «រាប់សិបម៉ែត្រ» ពីគោលដៅ ហើយពួកគេសោកស្ដាយចំពោះ «គ្រោះថ្នាក់ណាមួយដល់ជនស៊ីវិលដែលមិនពាក់ព័ន្ធ»។

ឧបទ្ទវហេតុនេះកំពុងស្ថិតក្រោមការពិនិត្យឡើងវិញ។ លោក Ahmed Abu Saifa គ្រូពេទ្យសង្គ្រោះបន្ទាន់នៅមន្ទីរពេទ្យ Al-Awda បាននិយាយថា អ្នករងរបួសភាគច្រើនជាកុមារ និងស្ត្រី។

នាយកប្រតិបត្តិអង្គការ UNICEF លោកស្រី Catherine Russel បានអំពាវនាវឱ្យមានបទឈប់បាញ់បន្ទាន់។ លោកស្រីបានសរសេរនៅលើបណ្តាញផ្សព្វផ្សាយសង្គមថា យោធាអ៊ីស្រាអែលចាំបាច់ត្រូវការការពារជនស៊ីវិល រួមទាំងកុមារ និងធានាឱ្យបាននូវ «ការអនុវត្តពេញលេញ» តាមច្បាប់មនុស្សធម៌អន្តរជាតិ។