ក្រុមអ្នកស្ម័គ្រចិត្តបានរាយការណ៍កាលពីថ្ងៃចន្ទថា ជនស៊ីវិលយ៉ាងហោចណាស់៤៦នាក់ ត្រូវបានសម្លាប់ និង៣៧នាក់ផ្សេងទៀតបានរងរបួសនៅក្នុងការវាយប្រហារដោយកងកម្លាំងគាំទ្ររហ័សយោធាប៉ារ៉ា (RSF) លើភូមិមួយក្នុងរដ្ឋ North Kordofan ភាគខាងលិចប្រទេសស៊ូដង់។

អង្គការវេជ្ជបណ្ឌិតស៊ូដង់ ជាអង្គការស្ម័គ្រចិត្តមួយ បានរាយការណ៍ថា ការវាយប្រហារបានកើតឡើងនៅក្នុងភូមិ Hillat Hamid។ ក្នុងចំណោមអ្នកស្លាប់ទាំង៤៦នាក់ មានស្ត្រី៥ នាក់ ហើយអ្នករបួសមានចំនួន ៣៧នាក់។ ក្រុមនេះបាននិយាយថា អ្នកស្រុកត្រូវបញ្ចុះសពជនរងគ្រោះនៅក្នុងផ្នូរធំមួយ។

ក្រុមនេះបានថ្កោលទោសនូវអ្វីដែលខ្លួនបានពិពណ៌នាថាជា «ការសម្លាប់រង្គាលដ៏បង្ហូរឈាម» ដោយនិយាយថា «ឧក្រិដ្ឋកម្មនេះ ជាផ្នែកមួយនៃការបន្តរំលោភបំពានយ៉ាងធ្ងន់ធ្ងរដែលកងកម្លាំងគាំទ្ររហ័សRSF បាននិងកំពុងប្រព្រឹត្តទៅលើជនស៊ីវិលនៅទូទាំងប្រទេសស៊ូដង់»។

អង្គការវេជ្ជបណ្ឌិត បានអំពាវនាវឱ្យកងកម្លាំង RSF បញ្ឈប់ជាបន្ទាន់នូវការវាយប្រហារបែបនេះ ហើយបានជំរុញសហគមន៍អន្តរជាតិមានចំណាត់ការយ៉ាងឆាប់រហ័សដើម្បីការពារជនស៊ីវិលដោយការដាក់ទណ្ឌកម្មរារាំងដល់មេដឹកនាំកងកម្លាំងគាំទ្ររហ័ស RSF ។