រយៈពេល ១០ឆ្នាំបន្ទាប់ពីអង្គការសហប្រជាជាតិ អនុម័តគោលដៅអភិវឌ្ឍន៍ប្រកបដោយចីរភាព SDG ១៧ចំណុចរបស់ខ្លួន ស្ថាប័នពិភពលោកមួយនេះបាននិយាយនៅចន្ទ (១៤ កក្កដា) ថា មនុស្សកាន់តែច្រើនឥឡូវនេះមានលទ្ធភាពប្រើអ៊ីនធឺណិត ប៉ុន្តែបញ្ហាសំខាន់ៗនៅតែមាន ដូចជាភាពអត់ឃ្លានកាន់តែអាក្រក់ទៅៗ ខណៈមនុស្សជាង ៨០០លាននាក់ លើពិភពលោក នៅតែរស់នៅក្នុងភាពក្រីក្របំផុត។

រដ្ឋជាសមាជិកអង្គការសហប្រជាជាតិ បានប្តេជ្ញាចិត្តក្នុងឆ្នាំ២០១៥ ដើម្បីតាមសម្រេចគោលដៅ ១៧ចំណុច ដែលរួមមានចាប់ពីការបញ្ចប់ភាពក្រីក្រខ្លាំង និងភាពអត់ឃ្លាន រហូតដល់ការស្វែងរកសមភាពយេនឌ័រ និងថាមពលស្អាតនៅឆ្នាំ២០៣០។ ប៉ុន្តែក្នុងរបាយការណ៍ចេញផ្សាយនៅថ្ងៃចន្ទនោះ អង្គការសហប្រជាជាតិនិយាយថា មានតែ ៣៥% នៃគោលដៅ SDG ប៉ុណ្ណោះកំពុងឈានទៅមុខ ខណៈពាក់កណ្តាលជាប់នៅទ្រឹង ហើយតួលេខសេសសល់កំពុងដើរថយក្រោយទៅវិញ។

របាយការណ៍បន្តថា តួលេខនេះបង្ហាញថា វឌ្ឍនភាពគឺ "យឺតយ៉ាវខ្លាំង និងមិនទាន់គ្រប់គ្រាន់នោះទេ" ខណៈគោលដៅមួយចំនួននៅតែធ្លាក់ចុះ។ របាយការណ៍និយាយថា នៅឆ្នាំ២០២៣ មនុស្ស ៧៥៧លាននាក់ (ពោលគឺ ៩,១% នៃចំនួនប្រជាជនពិភពលោក) បានទទួលរងពីភាពអត់ឃ្លាន កើនឡើងពីតួលេខ ៧១៣លាននាក់ (៧,៥%) ក្នុងឆ្នាំ២០១៩។

ទន្ទឹមនឹងនេះដែរ មនុស្សជាង ៨០០លាននាក់ - ប្រហែលម្នាក់ក្នុងចំណោម ១០នាក់ទូទាំងពិភពលោក - នៅតែរស់ក្នុងភាពក្រីក្របំផុត។ ប្រធានអង្គការសហប្រជាជាតិ លោក Antonio Guterres បានព្រមានក្នុងសន្និសីទសារព័ត៌មានមួយថា ពិភពលោកកំពុងប្រឈមមុខនឹងភាពអាសន្ននៃការអភិវឌ្ឍសកល៕