អគ្គមេធាវីរបស់ប្រទេសនេះ បាននិយាយកាលពីថ្ងៃចន្ទថា ជនអន្តោប្រវេសន៍ជាង ១០០នាក់ ក្នុងនោះមានស្ត្រី ៥នាក់ ត្រូវបានដោះលែងពីការឃុំឃាំង បន្ទាប់ពីត្រូវបានចាប់់ឃុំខ្លួនយកប្រាក់លោះ ដោយក្រុមជនអន្ធពាល នៅភាគខាងកើតប្រទេសលីប៊ី។

សេចក្តីថ្លែងការណ៍មួយរបស់អគ្គមេធាវី បានឲ្យដឹងថា៖«ក្រុមឧក្រិដ្ឋជន ដែលចូលរួមក្នុងការរៀបចំការរត់ពន្ធជនអន្តោប្រវេសន៍ ដកហូតសេរីភាពរបស់ពួកគេ ជួញដូរពួកគេ និងធ្វើទារុណកម្មពួកគេ ដើម្បីបង្ខំឲ្យ គ្រួសាររបស់ពួកគេ បង់ប្រាក់លោះសម្រាប់ការដោះលែងពួកគេ»។

ប្រទេសលីប៊ី បានក្លាយជាផ្លូវឆ្លងកាត់សម្រាប់ជនអន្តោប្រវេសន៍ដែលភៀសខ្លួនចេញពីជម្លោះ និងភាពក្រីក្រ ទៅកាន់ទ្វីបអឺរ៉ុប តាមផ្លូវដ៏គ្រោះថ្នាក់ឆ្លងកាត់វាលខ្សាច់ និងសមុទ្រមេឌីទែរ៉ាណេ បន្ទាប់ពីការផ្តួលរំលំលោក Muammar Qaddafi នៅក្នុងការបះបោរមួយ ដែលគាំទ្រដោយអង្គការណាតូ ក្នុងឆ្នាំ ២០១១។

ជនអន្តោប្រវេសន៍ជាច្រើនដែលអស់សង្ឃឹមក្នុងការធ្វើដំណើរតាមផ្លូវដ៏គ្រោះថ្នាក់នោះ បានធ្លាក់ចូលទៅក្នុងកណ្តាប់ដៃរបស់ក្រុមអ្នកជួញដូរ។ ជនអន្តោប្រវេសន៍ ដែលត្រូវបានដោះលែងទាំងនោះ ត្រូវបានឃុំខ្នៅក្នុងទីក្រុង Ajdabiya មានចម្ងាយប្រហែល ១៦០គីឡូម៉ែត្រ (១០០ម៉ាយ) ពីទីក្រុងធំទី២ Benghazi របស់ប្រទេសលីប៊ី។