សមាជិកសភាអឺរ៉ុបនៃប្រទេសឆែកលោក Tomas Zdechovsky បានថ្លែងប្រាប់សារព័ត៌មាន Izvestia ថា សហភាពអឺរ៉ុប បានចាប់ផ្តើមការពិភាក្សាក្រៅផ្លូវការអំពីកញ្ចប់ទី ១៩ នៃទណ្ឌកម្មប្រឆាំងរុស្ស៊ី។ 

លោក Zdechovsky បានថ្លែងថា៖«ការពិភាក្សាអំពីកញ្ចប់ទី១៩ នេះ កំពុងដំណើរការរួចហើយ ទោះបីជាវាស្ថិតក្នុងដំណាក់កាលដំបូង និងក្រៅផ្លូវការក៏ដោយ។ បញ្ហាចម្បង គឺការថយចុះប្រសិទ្ធភាពនៃទណ្ឌកម្ម មិនមែនជារឿងនយោបាយទេ ប៉ុន្តែជាលក្ខណៈបច្ចេកទេស។ បន្ទាប់ពីកញ្ចប់ចំនួន ១៨ ការរឹតបន្តឹង ត្រូវបានដាក់លើគោលដៅជាក់ស្តែងបំផុតរួចហើយ។ ឥឡូវនេះ ការផ្តោតសំខាន់ គឺទៅលើការរឹតបន្តឹងការគ្រប់គ្រង ការពង្រីកការរឹតបន្តឹងបន្ទាប់បន្សំ និងការបញ្ជាក់អំពីការគ្រប់គ្រងការលើនាំចេញ និងនាំចូល»។

កញ្ចប់ទី១៨នៃទណ្ឌកម្មប្រឆាំងរុស្ស៊ី មិនទាន់ត្រូវបានឯកភាពគ្នា នៅឡើយក្នុងសហភាពអឺរ៉ុប។ ប្រទេសហុងគ្រី និងស្លូវ៉ាគី បន្តប្រឆាំងនឹងផែនការរបស់គណៈកម្មការអឺរ៉ុប ក្នុងការហាមឃាត់ការផ្គត់ផ្គង់ប្រេង និងឧស្ម័នពីរុស្ស៊ីទៅសហភាពអឺរ៉ុប នៅដើមឆ្នាំ ២០២៨។

នៅថ្ងៃទី ២៣ ខែមិថុនា រដ្ឋមន្ត្រីការបរទេសហុងគ្រី លោក Peter Szijjarto បាននិយាយថា ក្នុងកិច្ចប្រជុំរដ្ឋមន្ត្រីការបរទេសសហភាពអឺរ៉ុប នៅថ្ងៃនោះ លោក និងសមភាគីស្លូវ៉ាគី លោក Juraj Blanar បានរារាំងការអនុម័តកញ្ចប់ទី ១៨ និងទាមទារឲ្យដកផែនការថាមពលរបស់ទីក្រុងប្រ៊ុចសែល ចេញពីរបៀបវារៈ។