អំឡុងកិច្ចពិភាក្សា នៅថ្ងៃអង្គារ (ទី១៥ ខែកក្កដា) ក្នុងរដ្ឋធានីរបស់ចិន មេដឹកនាំនៃប្រទេសអូស្ត្រាលី និងចិន បានស្វែងរកការពង្រឹងទំនាក់ទំនងពាណិជ្ជកម្មឲ្យកាន់តែស៊ីជម្រៅ បើទោះបីជាមានការខ្វែងគំនិតគ្នា អំពីសន្តិសុខក្នុងតំបន់ និងសិទ្ធិមនុស្សក៏ដោយ។

មេដឹកនាំចិន លោក Xi Jinping បានប្រាប់នាយករដ្ឋមន្ត្រីអូស្ត្រាលី លោក Anthony Albanese ថា ការស្វែងរកមូលដ្ឋានរួម ខណៈពេលដែលទុកដោយឡែកនូវការយល់ឃើញខុសគ្នា គឺស្របតាមផលប្រយោជន៍ជាមូលដ្ឋាននៃភាគីទាំង២ និងប្រជាជនរបស់ប្រទេសទាំង២។ ហើយលោក Albanese បានយល់ស្របនឹងការកត់សម្គាល់របស់លោក Xi ដោយនិយាយថា «វិធីសាស្រ្តនោះពិតជាបានផ្តល់នូវអត្ថប្រយោជន៍ជាវិជ្ជមាន ទាំងសម្រាប់ប្រទេសអូស្ត្រាលី និងប្រទេសចិន»។

អូស្ត្រាលី ក៏ដូចជាប្រទេសជាច្រើនទៀតក្នុងតំបន់អាស៊ីប៉ាស៊ីហ្វិកដែរ កំពុងស្ថិតក្នុងទីតាំងដ៏លំបាក ដោយត្រូវថ្លឹងថ្លែង រវាងចិន និងសហរដ្ឋអាមេរិក។ សេដ្ឋកិច្ចរបស់ប្រទេសនេះ ត្រូវពឹងផ្អែកយ៉ាងខ្លាំងលើការនាំចេញទៅចិន ក្នុងនោះមានរួមទាំងរ៉ែដែក សម្រាប់ឧស្សាហកម្មដែកផងដែរ ខណៈដែលខ្លួនក៏មានការព្រួយបារម្ភរួមជាមួយអាមេរិក ពាក់ព័ន្ធនឹងសកម្មភាពយោធាដែលកំពុងកើនឡើងរបស់ក្រុងប៉េកាំង នៅក្នុងតំបន់ប៉ាស៊ីហ្វិក ក្នុងនោះរួមទាំងនៅក្នុងដែនទឹកក្បែរប្រទេសអូស្ត្រាលីផងដែរ។

លោក Albanese បានប្រឹងប្រែងជួសជុលទំនាក់ទំនងរបស់អូស្ត្រាលីជាមួយប្រទេសចិន ចាប់តាំងពីលោកបានជាប់ឆ្នោត ក្នុងឆ្នាំ២០២២។

គួរបញ្ជាក់ថា លោក Albanese កំពុងមានវត្តមាននៅក្នុងទីក្រុងប៉េកាំង សម្រាប់ដំណើរទស្សនកិច្ចរយៈពេល ១សប្តាហ៍ នៅប្រទេសចិន ដែលបានចាប់ផ្តើមនៅទីក្រុងសៀងហៃ រដ្ឋធានីពាណិជ្ជកម្មរបស់ប្រទេសចិន ជាកន្លែងដែលរដ្ឋាភិបាល និងអ្នកដឹកនាំធុរកិច្ចនៃប្រទេសទាំង២ បានពិភាក្សាគ្នា អំពីការពង្រឹងកិច្ចសហប្រតិបត្តិការ ក្នុងវិស័យទេសចរណ៍ និងកាត់បន្ថយការបញ្ចេញកាបូន ក្នុងការជីកយករ៉ែដែក និងការផលិតដែក៕