តំណាងអចិន្ត្រៃយ៍អាមេរិកប្រចាំអង្គការណាតូ ( NATO) លោក Matthew Whitaker ជឿជាក់ថា សេចក្តីថ្លែងការណ៍របស់ប្រធានាធិបតីអាមេរិកលោក ដូណាល់ ត្រាំ ( Donald Trump) ស្តីពីការផ្គត់ផ្គង់សព្វាវុធដល់អ៊ុយក្រែន និងការដាក់កំហិតប្រឆាំងរុស្ស៊ីបន្ថែម នឹងបង្កឲ្យមានការឆ្លើយតបពីរុស្ស៊ី រួមទាំងពីលោក ប្រធានាធិបតី វ្ល៉ាឌីមៀ ពូទីន ( Vladimir Putin) ផងដែរ។

លោក Whitaker បានថ្លែងប្រាប់សារព័ត៌មាន Fox News ដោយលើកឡើងពីប្រទេសចិន និងឥណ្ឌាក្នុងចំណោមអ្នកទិញប្រេងសំខាន់ៗរបស់រុស្ស៊ី ដែលនឹងត្រូវរងផលប៉ះពាល់ដោយពន្ធនេះថា៖«ជាក់ស្តែង លោកប្រធានាធិបតី ពូទីន នឹងមានប្រតិកម្មចំពោះមិនត្រឹមតែអាវុធរបស់សហរដ្ឋអាមេរិក ដែលអាចផ្តល់ដល់ប្រជាជនអ៊ុយក្រែន ដោយការចំណាយជាបន្ទុករបស់អឺរ៉ុបប៉ុណ្ណោះទេ។ លោកក៏នឹងឆ្លើយតបចំពោះពន្ធនេះផងដែរ»។

នាពេលមុននេះ លោកប្រធានាធិបតី ត្រាំ បានប្រកាសថា ទីក្រុងវ៉ាស៊ីនតោន នឹងបន្តបញ្ជូនអាវុធ និងសម្ភារៈយោធា ទៅកាន់ទីក្រុងគីវ ប្រសិនបើអឺរ៉ុបយល់ព្រមចំណាយលើការផ្គត់ផ្គង់។ មេដឹកនាំអាមេរិករូបនេះ បានបញ្ជាក់ថា អង្គការណាតូ នឹងសម្របសម្រួលដំណើរការនេះ។ លើសពីនេះ លោកបានបញ្ជាក់ថា សហរដ្ឋអាមេរិក នឹងដាក់ពន្ធនាំចូលប្រមាណ ១០០%លើប្រទេសរុស្ស៊ី និងដៃគូពាណិជ្ជកម្មរបស់ខ្លួន ប្រសិនបើទីក្រុងមូស្គូ និងទីក្រុងវ៉ាស៊ីនតោន បរាជ័យក្នុងការឈានដល់កិច្ចព្រមព្រៀងស្តីពីដំណោះស្រាយមួយ នៅអ៊ុយក្រែនក្នុងរយៈពេល ៥០ថ្ងៃ។