ទីភ្នាក់ងារសារព័ត៌មានរដ្ឋ Xinhua បានរាយការណ៍ថា កាលពីថ្ងៃចន្ទ (ទី១៤ ខែកក្កដា) រដ្ឋមន្ត្រីការបរទេសចិន លោក Wang Yi បានលើកឡើងថា ទីក្រុងប៉េកាំង និងទីក្រុងញូវដេលី គួរតែធ្វើការឆ្ពោះទៅរកការជឿទុកចិត្តគ្នាទៅវិញទៅមក និងកិច្ចសហប្រតិបត្តិការ «ឈ្នះ-ឈ្នះ» បន្ទាប់ពីបានពិភាក្សាជាមួយសមភាគីឥណ្ឌា លោក Subrahmanyam Jaishankar។

បើយោងតាមទីភ្នាក់ងារសារព័ត៌មាន Xinhua បានឲ្យដឹងថា លោក Wang បាននិយាយថា ប្រទេសចិន និងឥណ្ឌាគួរតែ «ប្រកាន់ខ្ជាប់នូវទិសដៅនៃភាពជាអ្នកជិតខាងល្អ និងមិត្តភាព» ហើយ «ស្វែងរកផ្លូវ ដើម្បីឲ្យមានការគោរព និងការជឿទុកចិត្តគ្នាទៅវិញទៅមក ការរួមរស់ដោយសន្តិភាព ការអភិវឌ្ឍរួម និងកិច្ចសហប្រតិបត្តិការឈ្នះ-ឈ្នះ»។

គួរបញ្ជាក់ថា រដ្ឋមន្ត្រីការបរទេសទាំង២ បានជួបប្រជុំគ្នានៅទីក្រុងប៉េកាំង កាលពីថ្ងៃទី១៤ ខែកក្កដា ខណៈដែលប្រទេសចិន និងឥណ្ឌាស្វែងរកការជួសជុលទំនាក់ទំនង បន្ទាប់ពីមានការប៉ះទង្គិចគ្នា នៅឆ្នាំ២០២០ នៅតាមព្រំដែនរបស់ប្រទេសទាំង២។

ប្រទេសដែលមានប្រជាជនច្រើនជាងគេបំផុតរបស់ពិភពលោកទាំង២ គឺជាគូបដិបក្ខយ៉ាងធំ ដែលប្រកួតប្រជែងដណ្តើមឥទ្ធិពលយុទ្ធសាស្ត្រ នៅទូទាំងអាស៊ីខាងត្បូង ហើយព្រំដែនប្រវែង ៣.៥០០គីឡូម៉ែត្ររបស់ប្រទេសទាំង២ គឺជាប្រភពនៃភាពតានតឹងរ៉ាំរ៉ៃ។

ការប៉ះទង្គិចគ្នានៅឆ្នាំ២០២០ រវាងកងទ័ពរបស់ប្រទេសទាំង២ បាននាំឲ្យមានការប្រឈមមុខគ្នាផ្នែកយោធារយៈពេល ៤ឆ្នាំ ប៉ុន្តែកាលពីខែតុលា ភាគីទាំង២ បានយល់ព្រមលើការល្បាតនៅតំបន់ជម្លោះ។ នាយករដ្ឋមន្ត្រីឥណ្ឌា លោក Narendra Modi និងប្រធានាធិបតីចិន លោក Xi Jinping បានជួបគ្នាជាលើកដំបូងក្នុងរយៈពេល ៥ឆ្នាំ នៅចុងខែនោះ ដោយបានយល់ព្រមធ្វើការលើការកែលម្អទំនាក់ទំនង៕