ឯកអគ្គរដ្ឋទូតជប៉ុនប្រចាំនៅទីក្រុងមូស្គូ លោក Akira Muto បានថ្លែងប្រាប់ទីភ្នាក់ងារសារព័ត៌មាន TASS នៅក្នុងបទសម្ភាសន៍មួយថា ជប៉ុនមិនមានបំណងបន្ធូរបន្ថយប្រព័ន្ធទិដ្ឋាការរបស់ខ្លួនសម្រាប់ពលរដ្ឋរុស្ស៊ីនាពេលបច្ចុប្បន្ននេះទេ ប៉ុន្តែបញ្ជីឯកសារដែលត្រូវការសម្រាប់ការដាក់ពាក្យសុំទិដ្ឋាការ ត្រូវបានត្រួតពិនិត្យជាប្រចាំ។  

លោកបាននិយាយក្នុងការឆ្លើយតបទៅនឹងសំណួរពាក់ព័ន្ធមួយថា៖«បច្ចុប្បន្ននេះ យើងមិនមានផែនការបន្ថូរបន្ថយរបបទិដ្ឋាការសម្រាប់ប្រជាជនរុស្ស៊ីទេ ប៉ុន្តែយើងពិនិត្យជាប្រចាំនូវបញ្ជីឯកសារជាក់លាក់ ដែលត្រូវដាក់ជូន នៅពេលដាក់ពាក្យសុំទិដ្ឋាការ»។

លោកឯកអគ្គរដ្ឋទូត បានបន្ថែមថា ស្ថិតិលើភាគរយនៃការបដិសេធទិដ្ឋាការ មិនត្រូវបានរក្សាទុកទេ ប៉ុន្តែចំនួននេះ គឺទាបណាស់ ក្រៅពី «ករណីពិសេស»។

លោក Muto ក៏បានកត់សម្គាល់ផងដែរថា នៅឆ្នាំ ២០២៤ ជនជាតិរុស្ស៊ី ១០០.000នាក់ បានទៅលេងប្រទេសជប៉ុនក្នុងនោះ៨៥.០០០នាក់ បានធ្វើដំណើរជាភ្ញៀវទេសចរ។ លោកឯកអគ្គរដ្ឋទូត បានចង្អុលបង្ហាញថា «នៅឆ្នាំ ២០២៥ ចំនួននៃការធ្វើដំណើររបស់ជនជាតិរុស្ស៊ី ទៅកាន់ប្រទេសជប៉ុន ចាប់ពីខែមករាដល់ខែឧសភា បានឈានដល់ ៧២.000នាក់ រួចហើយ ដូច្នេះវាត្រូវបានគេរំពឹងថា នឹងមានប្រហែល ១៥០.000នាក់ នៅចុងឆ្នាំនេះ»។