លោក Prommin Lertsuridej (ព្រំម៉ីន លឺតសុរីដេ) អគ្គលេខាធិការរបស់នាយករដ្ឋមន្ត្រី បាននិយាយកាលពីថ្ងៃចន្ទ (ទី១៤ ខែកក្កដា) ថា នាយករដ្ឋមន្ត្រីថៃដែលកំពុងជួបការលំបាក គឺលោកស្រី Paetongtarn Shinawatra (ផែថងថាត ស៊ីណាវ៉ាត់) ប្រហែលជាមិនអាចបញ្ជូនឯកសារការពារក្តីរបស់លោកស្រីទៅតុលាការធម្មនុញ្ញបានទាន់ពេលវេលានោះទេ ហើយទំនងជានឹងស្វែងរកការពន្យារកាលកំណត់។

លោក Prommin បាននិយាយសំដៅលើសំណុំរឿងរបស់តុលាការធម្មនុញ្ញដែលប្តឹងដោយសមាជិកព្រឹទ្ធសភាចំនួន ៣៦រូប ដែលកំពុងអំពាវនាវឲ្យបញ្ចប់តំណែងរបស់លោកស្រី Paetongtarn ដោយសារត្រូវបានចាត់ទុកថា បានបង្កឲ្យភាពចលាចលនយោបាយ ក្នុងប្រទេស។

គួរបញ្ជាក់ថា កាលពីថ្ងៃទី១ ខែកក្កដា តុលាការធម្មនុញ្ញ បានព្យួរលោកស្រី Paetongtarn ពីតួនាទីជានាយករដ្ឋមន្ត្រី ដោយរង់ចាំពិនិត្យញត្តិនោះឡើងវិញ។ តុលាការទុកពេលឲ្យ ១៥ថ្ងៃ ដើម្បីដាក់ឯកសារការពារក្ដី។

លោក Prommin បានប្រាប់ឲ្យដឹងថា៖ «យើងកំពុងរៀបចំឯកសារការពារក្ដី ប៉ុន្តែប្រសិនបើវាមិនអាចបញ្ចប់ទាន់ពេលវេលានោះទេ យើងនឹងស្នើសុំឲ្យតុលាការពន្យារថ្ងៃកំណត់»។

យ៉ាងណាក្ដី លោក Prommin បានបដិសេធមិនបញ្ជាក់ថា តើអតីតឧបនាយករដ្ឋមន្ត្រី លោក Wissanu Krea-ngam (វិស្ណុ គ្រឿង៉ាម) នឹងដឹកនាំក្រុមមេធាវីការពារក្តីឲ្យលោកស្រី Paetongtarn ដែរ ឬទេ។ តែលោកបានកត់សម្គាល់ថា ក្រុមការពារក្ដីត្រូវបានបង្កើតឡើងរួចហើយ បើទោះជាព័ត៌មានលម្អិតនៅមិនទាន់បញ្ចេញឲ្យដឹងក៏ដោយ៕