ការផ្ទុះគ្រាប់ជាបន្តបន្ទាប់បានអង្រួនតំបន់ហ្កាហ្សានៅព្រឹកថ្ងៃអង្គារនេះ ហើយសំណុំផ្សែងយ៉ាងក្រាស់ ត្រូវបានមើលឃើញពីតំបន់ភាគខាងត្បូងអ៊ីស្រាអែល រយៈពេល ១ថ្ងៃ ក្រោយអេហ្ស៊ីប និយាយថា កិច្ចព្រមព្រៀងអ៊ីស្រាអែល-សហភាពអឺរ៉ុប ពុំបានបង្កើនជំនួយចូលទៅកាន់ដែនដីឡោមព័ទ្ធមួយនេះឡើយ ។

រដ្ឋមន្រ្តីការបរទេសអេហ្ស៊ីបលោក Badr Abdelatty និយាយកាលពីថ្ងៃចន្ទថា លំហូរជំនួយចូលទៅកាន់តំបន់ហ្កាហ្សា ពុំបានបង្កើននោះទេ បើទោះបីជាមានកិច្ចព្រមព្រៀងកាលពីសប្តាហ៍មុនរវាងអ៊ីស្រាអែល និងសហភាពអឺរ៉ុប ទទួលបានលទ្ធផលល្អក៏ដោយ ។

លោក Abdelatty និយាយប្រាប់ក្រុមអ្នកសារព័ត៌មានមុនជំនួបសហភាពអឺរ៉ុប-តំបន់មជ្ឈិមបូព៌ានៅទីក្រុងព្រុចសែលនាថ្ងៃចន្ទថា គ្មានអ្វីផ្លាស់ប្តូរនោះទេលើមូលដ្ឋានគ្រឹះ ។

ពេលសួរពីជំហានអ្វីខ្លះអ៊ីស្រាអែលនឹងធ្វើ រដ្ឋមន្រ្តីការបរទេសអ៊ីស្រាអែលលោក Gideon Saar បាននិយាយពីការយោគយល់ជាមួយសហភាពអឺរ៉ុប ប៉ុន្តែលោកពុំបានផ្តល់សេចក្តីលម្អិតពីការអនុវត្តជំហាននោះទេ ។

របាយការណ៍រួមរបស់អង្គការសហប្រជាជាតិ(UN) បាននិយាយកាលពីខែមុនថា យុទ្ធនាការសឹកនៅបន្តរបស់អ៊ីស្រាអែល និងការបិទច្រក បណ្តាលឲ្យពលរដ្ឋទាំងមូល ២,៣លាននាក់ ក្នុងតំបន់ហ្កាហ្សា ប្រឈមនឹងអសន្តិសុខស្បៀងធ្ងន់ធ្ងរ ក្នុងនោះមនុស្សជិតកន្លះលាននាក់ ប្រឈមហានិភ័យខ្ពស់នៃគ្រោះទុរ្ភិក្ស នៅដំណាចខែកញ្ញាខាងមុខនេះ ៕