ការិយាល័យសិទ្ធិមនុស្សរបស់អង្គការសហប្រជាជាតិ បាននិយាយនៅថ្ងៃអង្គារនេះថា មានការកើនឡើងនៃការសម្លាប់ និងការវាយប្រហារប្រឆាំងនឹងជនជាតិប៉ាឡេស្ទីន ដោយអ្នកតាំងលំនៅ និងកងកម្លាំងសន្តិសុខ នៅតំបន់វេសបែង (West Bank) ក្នុងប៉ុន្មានសប្តាហ៍ថ្មីៗនេះ។

លោក Thameen Al-Kheetan អ្នកនាំពាក្យការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OCHCR) បានប្រាប់អ្នកយកព័ត៌មាន នៅទីក្រុងហ្សឺណែវថា៖«អ្នកតាំងលំនៅអ៊ីស្រាអែល និងកងកម្លាំងសន្តិសុខ បានបង្កើនការសម្លាប់ ការវាយប្រហារ និងការបៀតបៀនប្រជាជនប៉ាឡេស្ទីន នៅតំបន់វេសបែង រួមទាំងទីក្រុងហ្ស៊េរុយសាឡឹមខាងកើតផងដែរ»។

ប្រជាជនប៉ាឡេស្ទីនប្រហែល ៣០.000នាក់ ត្រូវបានផ្លាស់ទីលំនៅដោយបង្ខំនៅភាគខាងជើងនៃតំបន់ វេសបែង តាំងពីយោធាអ៊ីស្រាអែល បានចាប់ផ្តើមប្រតិបត្តិការ «ជញ្ជាំងដែក» របស់ខ្លួន។

OHCHR បាននិយាយថា អ៊ីស្រាអែលកំពុងរួមចំណែកដល់ការបន្តបង្កើននូវការដាក់តំបន់វេសប៊ែងជាឧបសម្ព័ន្ធរបស់ខ្លួន ជាការបំពានច្បាប់អន្តរជាតិ។

កាលពីខែមិថុនា អង្គការសហប្រជាជាតិ បានកត់ត្រាចំនួនខ្ពស់បំផុតប្រចាំខែនៃជនជាតិប៉ាឡេស្ទីនដែលរងរបួស ក្នុងរយៈពេលជាងពីរទសវត្សរ៍ នៅតំបន់វេសបែង។