ស៊ីហ្គេម៖ ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ រៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) បានបញ្ជាក់ថា កីឡាករ-កីឡាការិនីក្រុមជម្រើសជាតិ គ្រូបង្វឹក និងមន្ដ្រីកីឡាដែលទទួលបានការអនុញ្ញាតពីសម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ក្នុងការចាក់វ៉ាក់សាំងបង្ការជំងឺកូវីដ-១៩ កាលពីដើមខែមីនាកន្លងទៅនៅមិនទាន់ចាក់អស់នោះទេ ដោយអ្នកសេសសល់នឹងបន្ដចាក់បង្គ្រប់លើកទី១ នាថ្ងៃទី១៥ ខែមីនា ឆ្នាំ២០២១ ខាងមុខ។
រដ្ឋលេខាធិការក្រសួងទេសចរណ៍ដដែលបន្ដថា បញ្ជីឈ្មោះកីឡាករ-កីឡាការិនី គ្រូបង្វឹក និងមន្ដ្រីកីឡាដែលត្រូវបាន CAMSOC ស្នើទៅសម្ដេចតេជោនាយករដ្ឋមន្ដ្រីកាលពីថ្មីៗគឺមានចំនួន ១,០៥១នាក់ ខណៈយុទ្ធនាការចាក់វ៉ាក់សាំងលើកទី១ កាលពីថ្ងៃទី០២, ០៣ និងថ្ងៃទី០៤ ខែមីនាកន្លងទៅទើបចាក់បានជាង ៨០០នាក់ ហើយនៅសល់ជាង ២០០នាក់ទៀត ក្នុងនោះមានក្រុមបាល់ទាត់ កីឡាជិះសេះ គ្រូបង្វឹក និងមន្ដ្រីកីឡាពាក់ព័ន្ធមួយចំនួននឹងត្រូវចាក់បង្គ្រប់លើកទី១ ឲ្យគ្រប់បញ្ជី ១,០៥១នាក់នាថ្ងៃទី១៥ ខែមីនាសប្ដាហ៍ក្រោយ។ ប៉ុន្ដែនៅថ្ងៃទី១៥ ខែមីនាខាងមុខដែរ បន្ទាប់ពីទទួលបានភ្លើងខៀវពីសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងជាប្រធាន CAMSOC ក្នុងការជំរុញការបន្ដចាក់ដល់អ្នកពាក់ព័ន្ធផ្សេងទៀត ដែលត្រៀមចូលរួមស៊ីហ្គេមនាចុងឆ្នាំ២០២១ នៅប្រទេសវៀតណាម លេខាធិការដ្ឋាន CAMSOC ក៏កំពុងរៀបចំសំណើរដើម្បីស្នើសុំប្រមាណជាង ២០០នាក់ទៀតដើម្បីធ្វើការចាក់លើកទី១ នៅថ្ងៃជាមួយគ្នានោះផងដែរ ពិសេសក្រុមសិល្បៈករ-សិល្បៈការិនី និងក្រុមគុនល្បុក្កតោ ដែលត្រូវចេញទៅសម្ដែងក្នុងពិធីទទួលទង់ស៊ីហ្គេមពីវៀតណាម នាចុងឆ្នាំ២០២១ នេះ។
ឯកឧត្តម វ៉ាត់ ចំរើន បានបញ្ជាក់ថា ការងារស្នើសុំអ្នកពាក់ព័ន្ធ ដើម្បីធ្វើការចាក់វ៉ាក់សាំងការពារជំងឺកូវីដ-១៩ នេះនឹងត្រូវរៀបចំឲ្យបានចប់សព្វគ្រប់ក្នុងពេលឆាប់ៗ មុនឈានដល់ការចាក់លើកទី២ នាពេលឆាប់ៗខាងមុខ សម្រាប់កីឡាករ-កីឡាការិនីជម្រើសជាតិ គ្រូបង្វឹក និងមន្ដ្រីកីឡាដែលបានចាក់វ៉ាក់សាំងរួចកាលពីថ្ងៃទី០២, ០៣ និងទី០៤ ខែមីនាកន្លងទៅ ដើម្បីបង្កើនទំនុកចិត្តក្នុងការហ្វឹកហាត់ត្រៀមចេញទៅហាត់ និងប្រកួតលើឆាកអន្ដរជាតិក្នុងឆ្នាំ២០២១ ពិសេសការហ្វឹកហាត់ពង្រឹងសមត្ថភាព ត្រៀមឆ្ពោះទៅស៊ីហ្គេមឆ្នាំ២០២៣ នៅប្រទេសកម្ពុជាតែម្ដង៕
អត្ថបទ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
