រដ្ឋមន្ត្រីការបរទេសបារាំង លោក Jean-Noel Barrot នៅថ្ងៃអង្គារ (ទី១៥ ខែកក្កដា) នេះ បានបញ្ជាក់ថា ប្រទេសបារាំង អង់គ្លេស និងអាល្លឺម៉ង់ នឹងចាប់ផ្ដើមអនុវត្តយន្តការដាក់ទណ្ឌកម្មឡើងវិញភ្លាមៗរបស់អង្គការសហប្រជាជាតិ (UN) លើប្រទេសអ៊ីរ៉ង់ នៅចុងខែសីហា ប្រសិនបើគ្មានវឌ្ឍនភាពជាក់ស្តែងណាមួយ ត្រូវបានកើតឡើង ជុំវិញកិច្ចព្រមព្រៀងនុយក្លេអ៊ែរ នាពេលនោះ។

នៅមុនកិច្ចប្រជុំជាមួយរដ្ឋមន្ត្រីការបរទេសសហភាពអឺរ៉ុប (EU) នៅទីក្រុងប្រ៊ុចសែល ប្រទេសបែលហ្ស៊ិក លោក Barrot បានប្រាប់អ្នកសារព័ត៌មានថា៖ «ប្រទេសបារាំង និងដៃគូរបស់ខ្លួន មានសិទ្ធិក្នុងការអនុវត្តឡើងវិញនូវការដាក់ទណ្ឌកម្មជាសកលលើអាវុធ ធនាគារ និងឧបករណ៍នុយក្លេអ៊ែរដែលត្រូវបានលុប កាលពី ១០ឆ្នាំមុន។ ប្រសិនបើគ្មានការប្តេជ្ញាចិត្តរឹងមាំ ជាក់ស្តែង និងអាចជឿជាក់បានពីអ៊ីរ៉ង់ យើងនឹងធ្វើបែបនោះយ៉ាងយូរបំផុត នៅចុងខែសីហា»។  

គួរបញ្ជាក់ថា យន្តការដាក់ទណ្ឌកម្មឡើងវិញភ្លាមៗ គឺជាផ្នែកមួយនៃសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិលេខ ២២៣១ ដែលគាំទ្រផែនការសកម្មភាពគ្រប់ជ្រុងជ្រោយរួមឆ្នាំ២០១៥ ឬ JCPOA។ 

លក្ខខណ្ឌនោះអនុញ្ញាតឲ្យប្រទេសពាក់ព័ន្ធណាមួយនៅក្នុងកិច្ចព្រមព្រៀងនុយក្លេអ៊ែរ អាចដាក់ទណ្ឌកម្មឡើងវិញ ប្រសិនបើអ៊ីរ៉ង់ត្រូវបានចាត់ទុកថា មិនអនុវត្តតាម។ ប្រសិនបើគ្មានដំណោះស្រាយ ដើម្បីបន្តរក្សាការបន្ធូរបន្ថយទណ្ឌកម្មនេះ ក្នុងរយៈពេល ៣០ថ្ងៃទេនោះ រាល់វិធានការរបស់ UN ពីមុន នឹងមានឡើងវិញដោយស្វ័យប្រវត្តិ៕