ប្រភពចំនួនបីដែលជិតស្និទ្ធនឹងវិមានក្រឹមឡាំងបាននិយាយថា ប្រធានាធិបតីរុស្ស៊ី លោក Vladimir Putin មានបំណងបន្តការប្រយុទ្ធនៅអ៊ុយក្រែន រហូតដល់លោកខាងលិចយល់ព្រមក្នុងលក្ខខណ្ឌសន្តិភាពរបស់លោក ដោយមិនញញើតបន្តិចសោះឡើយនឹងការគំរាមពីលោកប្រធានាធិបតីអាមេរិក Donald Trump ចំពោះការដាក់ទណ្ឌកម្មកាន់តែតឹងរ៉ឹង ហើយការវាយយកទឹកដីរបស់អ៊ុយក្រែន អាចនឹងពង្រីកកាន់តែខ្លាំង នៅពេលកងកម្លាំងរុស្ស៊ី បន្តវាយរុលទៅមុខ។

ប្រភពទាំងនោះបន្តថា លោក Putin — ដែលបានបញ្ជាកងទ័ពរុស្ស៊ីឱ្យចូលទៅក្នុងអ៊ុយក្រែន នៅខែកុម្ភៈ ឆ្នាំ២០២២ — ជឿជាក់ថាសេដ្ឋកិច្ច និងយោធារបស់ទីក្រុងមូស្គូ មានភាពរឹងមាំគ្រប់គ្រាន់ដើម្បីទប់ទល់នឹងទណ្ឌកម្មបន្ថែមរបស់លោកខាងលិច។

លោក Trump កាលពីថ្ងៃចន្ទ បានសម្តែងការខកចិត្តចំពោះការបដិសេធរបស់លោក Putin ក្នុងការយល់ព្រមលើបទឈប់បាញ់មួយ និងបានគំរាមដាក់ទណ្ឌកម្មកាន់តែតឹងលើរុស្ស៊ី ប្រសិនបើពុំមានកិច្ចព្រមព្រៀងសន្តិភាពក្នុងពេល ៥០ថ្ងៃទេនោះ។

ប្រភពរុស្ស៊ីទាំងបីខាងលើនិយាយថា លោក Putin នឹងមិនបញ្ឈប់សង្គ្រាមក្រោមសម្ពាធពីលោកខាងលិចទេ ហើយជឿជាក់ថារុស្ស៊ី -ដែលបានរួចផុតពីទណ្ឌកម្មដ៏តឹងតែងបំផុតមុនៗរបស់លោកខាងលិច- ក៏នៅតែអាចស៊ូទ្រាំនឹងការលំបាកខាងសេដ្ឋកិច្ចបន្ថែមទៀត រួមទាំងការគំរាមដាក់ពន្ធដ៏ខ្ពស់របស់អាមេរិក ដែលផ្តោតលើអ្នកទិញប្រេងរុស្ស៊ីផងដែរ។ ប្រភពសង្កត់ធ្ងន់ថា សម្ពាធសេដ្ឋកិច្ច នឹងមិនអាចបង្ខំមេដឹកនាំរុស្ស៊ីរូបនេះឱ្យផ្លាស់ប្តូរផ្លូវក្នុងលក្ខខណ្ឌសន្តិភាពរបស់លោកបានទេ។

ប្រភពបញ្ជាក់ថា លក្ខខណ្ឌសន្តិភាពរបស់លោក Putin រួមមានការសន្យាដែលមានចំណងផ្លូវច្បាប់ថាអង្គការណាតូនឹងមិនពង្រីកទៅភាគខាងកើត អព្យាក្រឹតភាពរបស់អ៊ុយក្រែន និងដែនកំណត់លើកងកម្លាំងប្រដាប់អាវុធរបស់ទីក្រុងគីវ ការការពារអ្នកនិយាយភាសារុស្ស៊ីដែលរស់នៅទីនោះ និងការយល់ព្រមប្រគល់ទឹកដីអ៊ុយក្រែនដែលកងកម្លាំងក្រុងមូស្គូវាយយកបាន បន្តនៅក្នុងដៃរបស់រុស្ស៊ី៕