ទោចក្រយាន៖ សហព័ន្ធកីឡាទោចក្រយានកម្ពុជាបានបន្ដរៀបចំការប្រកួតជ្រើសរើសជើងឯកថ្នាក់ជាតិឆ្នាំ២០២១ នៅខេត្តសៀមរាបចាប់ពីថ្ងៃទី១១ ដល់ថ្ងៃទី១៣ ខែមករា ឆ្នាំ២០២២ ខាងមុខនេះដើម្បីជាឱកាសពង្រឹងសមត្ថភាព និងបច្ចេកទេស ទាំងកីឡាករ-កីឡាការិនី និងមន្ដ្រីបច្ចេកទេសដើម្បីសម្រួចទិសដៅឆ្ពោះទៅស៊ីហ្គេមឆ្នាំ២០២២។
លោក នូ ចំរើន អគ្គលេខាធិការសហព័ន្ធបានថ្លែងក្នុងសន្និសីទសារព័ត៌មានកាលពីថ្ងៃទី០៦ ខែមករាថា នេះជាលើកទី២ ហើយដែលសហព័ន្ធរៀបចំជើងឯកថ្នាក់ជាតិនៅខេត្តសៀមរាប ដែលជាខេត្តត្រូវបានកំណត់ជាទីតាំងត្រៀមធ្វើម្ចាស់ផ្ទះស៊ីហ្គេមឆ្នាំ២០២៣ លើប្រភេទកីឡាទោចក្រយាន។ តាមរយៈនេះលោករំពឹងថា ការប្រកួតនេះនឹងក្លាយជាឱកាសដ៏ល្អដើម្បីវាស់ស្ទង់ និងបង្កើនគុណភាពកីឡាករ-កីឡាការិនី ក៏ដូចជាមន្ដ្រីបច្ចេកទេសឆ្ពោះទៅព្រឹត្តិការណ៍ជាប្រវត្តិសាស្ដ្រនៅកម្ពុជា។ លោកបន្ដថា គោលដៅនៃការរៀបចំព្រឹត្តការណ៍ប្រចាំឆ្នាំនេះ ទី១-អនុវត្តតាមផែនការយុទ្ធសាស្ត្ររបស់សហព័ន្ធ ក្រោមការចង្អុលបង្ហាញរបស់ឯកឧត្តម ប៉ាន សូរស័ក្តិ ប្រធានសហព័ន្ធ ដែលបានដាក់ចេញនូវផែនការពង្រឹងសមត្ថភាពគណៈកម្មការបច្ចេកទេស និងគណៈកម្មការរៀបចំការប្រកួតក្នុងដំណើរឈានទៅទទួលរៀបចំធ្វើជាម្ចាស់ផ្ទះស៊ីហ្គេម ក៏ដូចជាការប្រកួតកីឡាទោចក្រយានលក្ខណៈអន្តរជាតិនានា។ ទី២-គឺផ្ដល់ឱកាសដល់កីឡាករ-កីឡាការិនីបានបញ្ចេញទេពកោសល្យ និងជំនាញដើម្បីអភិវឌ្ឍសមត្ថភាព និងកម្រិតបច្ចេកទេសរបស់ពួកគេបន្ថែមទៀត។
លោក នូ ចំរើន បន្ថែមថា ថ្វីត្បិតតែវិបត្តិជំងឺកូវីដ-១៩ បានធ្វើឲ្យការប្រកួតប្រជែងកម្រិតខ្ពស់មួយនេះបានពន្យារពេល ប៉ុន្តែមិនអាចផ្លាស់ប្តូរឆន្ទៈ និងគោលដៅនៃការរៀបចំនេះបានទេ ដោយសហព័ន្ធនៅតែពង្រឹងលើការផលិតធនធានកីឡាទោចក្រយាន ក៏ដូចជាការអភិវឌ្ឍគុណភាពបច្ចេកទេសរបស់កីឡាករ-កីឡាការិនីជម្រើសជាតិត្រៀមឆ្ពោះទៅប្រកួតប្រជែងក្នុងព្រឹត្តិការណ៍កីឡាថ្នាក់តំបន់ រួមមានកីឡាស៊ីហ្គេមនាឆ្នាំ២០២២ នៅវៀតណាម ពិសេសគឺស៊ីហ្គេមឆ្នាំ២០២៣ នៅកម្ពុជាតែម្ដង។ ជាមួយការរៀបចំជើងឯកថ្នាក់ជាតិនេះដែរ កីឡាទោចក្រយានកម្ពុជាក៏ទទួលបានការឧបត្ថម្ភពីវិស័យឯកជាច្រើន បន្ថែមលើថវិការបស់ក្រសួងអប់រំ យុវជន និងកីឡាផងដែរ ពិសេសក្រុមហ៊ុន Herbalife ដែលរយៈពេល ២ឆ្នាំចុងក្រោយនេះបានចំណាយថវិកាខ្ទង់ម៉ឺនដុល្លារ ដើម្បីចូលរួមគាំទ្រការអភិវឌ្ឍ និងការរៀបចំការប្រកួតប្រចាំឆ្នាំរបស់សហព័ន្ធកីឡាទោចក្រយានកម្ពុជា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
