សារព័ត៌មានអាមេរិក Axios បានរាយការណ៍ដោយដកស្រង់ប្រភពចំនួនបីថា រដ្ឋមន្ត្រីការបរទេសអាមេរិក លោក Marco Rubio និងបណ្ដារដ្ឋមន្ត្រីការបរទេសបារាំង អាល្លឺម៉ង់ និងអង់គ្លេស បានព្រមព្រៀងគ្នានៅក្នុងជំនួបតាមទូរសព្ទកាលពីថ្ងៃចន្ទសប្ដាហ៍នេះ ក្នុងការដាក់កាលបរិច្ឆេទនៅចុងខែសីហា ជាថ្ងៃផុតកំណត់ជាក់ស្តែងសម្រាប់ការឈានដល់កិច្ចព្រមព្រៀងនុយក្លេអ៊ែរថ្មីមួយជាមួយអ៊ីរ៉ង់។

ប្រសិនបើពុំមានកិច្ចព្រមព្រៀងណាមួយត្រូវបានឈានដល់ក្នុងពេលកំណត់នោះ មហាអំណាចអឺរ៉ុបទាំងបីនេះ គ្រោងនឹងដាក់យន្តការ "ត្រឡប់ទៅស្ថានភាពដើម" ដែលដាក់ឡើងវិញដោយស្វ័យប្រវត្តិនូវរាល់ទណ្ឌកម្មដ៏ធ្ងន់ធ្ងរនានារបស់ក្រុមប្រឹក្សាសន្តិសុខអង្គការសហប្រជាជាតិ ដែលធ្លាប់ត្រូវបានដកចេញក្រោមកិច្ចព្រមព្រៀងអ៊ីរ៉ង់ ឆ្នាំ២០១៥ នេះបើយោងតាមរបាយការណ៍របស់ Axios។

ក្រុមមន្ត្រីអាមេរិក និងអឺរ៉ុបចាត់ទុកយន្តការត្រឡប់ទៅស្ថានភាពដើមនេះថាជាឧបករណ៍ចរចាដើម្បីដាក់សម្ពាធទីក្រុងតេអេរ៉ង់ និងជាជម្រើសចុងក្រោយ ប្រសិនបើការទូតបរាជ័យ។ ប៉ុន្តែភាគីអ៊ីរ៉ង់ប្រកែកថា ពុំមានមូលដ្ឋានផ្លូវច្បាប់ដើម្បីដាក់ទណ្ឌកម្មទាំងនោះឡើងវិញទេ ហើយបានគំរាមដកខ្លួនចេញពីសន្ធិសញ្ញាមិនរីកសាយភាយនុយក្លេអ៊ែរ ជាការឆ្លើយតបទៅអឺរ៉ុបវិញ។

យោងតាមប្រភពបានឱ្យដឹងថា ភាគីអឺរ៉ុបឥឡូវនេះ គ្រោងនឹងពិភាក្សាជាមួយអ៊ីរ៉ង់ ក្នុងរយៈពេលប៉ុន្មានថ្ងៃ និងប៉ុន្មានសប្តាហ៍ខាងមុខ ជាមួយនឹងសារទៅកាន់ទីក្រុងតេអេរ៉ង់ថា អ៊ីរ៉ង់អាចជៀសវាងការដាក់ទណ្ឌកម្មឡើងវិញនោះបាន ប្រសិនបើខ្លួនចាត់វិធានការដើម្បីធានាដល់ពិភពលោកអំពីកម្មវិធីនុយក្លេអ៊ែររបស់ខ្លួន៕