អ្នកនាំពាក្យក្រសួងការបរទេសចិន លោក Lin Jian កាលពីថ្ងៃអង្គារ (១៥ កក្កដា) បានរិះគន់លើអ្វីដែលគេហៅថា "ទំនាក់ទំនងការទូត" រវាងប៉ារ៉ាហ្គាយ និងតំបន់តៃវ៉ាន់របស់ចិន ដោយនិយាយថា ទីក្រុងប៉េកាំងបានបង្ហាញជំហររបស់ខ្លួនយ៉ាងច្បាស់ជាច្រើនលើកច្រើនសារមកហើយលើ "គោលការណ៍ចិនតែមួយ" ក្នុងការឆ្លើយតបទៅនឹងសំណួរដែលថាប៉ារ៉ាហ្គាយ គ្រោងរៀបចំទទួលមេដឹកនាំតំបន់តៃវ៉ាន់ លោក Lai Ching-te ក្នុងទស្សនកិច្ចនៅខែក្រោយនេះ ហើយនិងអាចមានការឈប់សំចតនៅសហរដ្ឋអាមេរិក ក្នុងអំឡុងពេលហោះហើរឆ្លងកាត់។

លោក Lin បាននិយាយថា គោលការណ៍ចិនតែមួយ គឺជាបទដ្ឋានមូលដ្ឋានក្នុងទំនាក់ទំនងអន្តរជាតិ និងឯកភាពអន្តរជាតិ ហើយការប្រកាន់យកគោលការណ៍ចិនតែមួយគឺជារឿងដ៏ត្រឹមត្រូវ ព្រោះនោះជាប្រវត្តិសាស្រ្តច្បាស់លាស់ និងនិន្នាការមតិសាធារណៈ។ អ្នកនាំពាក្យរូបនេះបានសង្កត់ធ្ងន់ថា ប៉ារ៉ាហ្គាយត្រូវតែបញ្ឈប់ការបែរខ្នងដាក់ប្រទេសចិន ឈប់ធ្វើជាអ្នកក្រៅក្នុងសហគមន៍អន្តរជាតិ ហើយត្រូវទទួលស្គាល់គោលការណ៍ចិនតែមួយ និងផ្លាស់ប្តូរទំនាក់ទំនងរបស់ខ្លួនជាមួយចិន ឱ្យបានឆាប់។

ដំណើរទស្សនកិច្ចរបស់មេដឹកនាំកោះតៃវ៉ាន់គ្រប់រូបទៅកាន់អាមេរិកកណ្តាល និងខាងត្បូង តែងតែពាក់ព័ន្ធនឹងអ្វីដែលគេដឹងជាផ្លូវការថាគ្រាន់តែជាការឈប់សំចតប៉ុណ្ណោះនៅសហរដ្ឋអាមេរិក ប៉ុន្តែជារឿយៗដំណើរសំចតនេះជាផ្នែកដ៏សំខាន់បំផុតនៃទស្សនកិច្ច ដោយសារទីក្រុងវ៉ាស៊ីនតោន គឺជាអ្នកគាំទ្រអន្តរជាតិកំពូល និងជាអ្នកផ្គត់ផ្គង់អាវុធដល់កោះស្វ័យគ្រប់គ្រងមួយនេះ។

ប្រទេសចិន ជំទាស់យ៉ាងខ្លាំងចំពោះអន្តរកម្មណាមួយរវាងតំបន់តៃវ៉ាន់ និងសហរដ្ឋអាមេរិក ហើយតែងតែថ្កោលទោសចំពោះការឈប់សំចតឆ្លងកាត់បែបនេះរបស់មេដឹកនាំកោះ។ ចិននិយាយថា កោះតៃវ៉ាន់ជាខេត្តមួយរបស់ខ្លួន ហើយគ្មានសិទ្ធិក្នុងការធ្វើទំនាក់ទំនងរដ្ឋនិងរដ្ឋនោះទេ៕