យោងតាមការស្ទង់មតិថ្មីមួយរបស់ប្រទេសប្រហែលជាង២០ដោយមជ្ឈមណ្ឌលស្រាវជ្រាវ Pew បានឲ្យដឹងថា ទស្សនៈវិស័យលើប្រទេសចិន និងមេដឹកនាំរបស់ខ្លួន លោក Xi Jinping បានកើនឡើងក្នុងប្រទេសជាច្រើននៅទូទាំងពិភពលោក ខណៈទស្សនវិស័យលើសហរដ្ឋអាមេរិក និងប្រធានាធិបតី Donald Trump ធ្លាក់ចុះដុនដាបកាន់តែខ្លាំង ។

ដោយបានចេញផ្សាយកាលពីថ្ងៃអង្គារសប្ដាហ៍នេះ ការស្ទង់មតិបង្ហាញថា ទស្សនៈវិស័យអន្តរជាតិនៃមហាអំណាចទាំងពីរ និងមេដឹកនាំប្រទេសទាំងពីរកាន់តែខិតជិតគ្នាចាប់តាំងពីឆ្នាំ២០២០មក។ លទ្ធផលនេះមានភាពខុសគ្នាយ៉ាងខ្លាំងពីរយៈពេលជាច្រើនឆ្នាំកន្លងមក នៅពេលសហរដ្ឋអាមេរិក និងមេដឹកនាំរបស់ខ្លួន គឺអតីតប្រធានាធិបតី Joe Biden ទទួលបានការពេញចិត្តលើទស្សនៈវិស័យអន្តរជាតិ ច្រើនជាងប្រទេសចិន និងមេដឹកនាំចិន ដោយគេមើលឃើញថា លោក Joe Biden មានគម្លាតឆ្ងាយពីចិនខ្លាំងដោយរួបរួមគ្នាប្រឆាំងតែប្រទេសចិន។

នៅក្នុងការស្ទង់មតិចុងក្រោយរបស់ខ្លួនលើប្រទេសចំនួន ២៤ មជ្ឈមណ្ឌលស្រាវជ្រាវ Pew បានរកឃើញថាសហរដ្ឋអាមេរិកត្រូវបានគេមើលឃើញថាមានការពេញចិត្តជាងប្រទេសចិននៅក្នុងប្រទេសចំនួន ៨ ខណៈប្រទេសចិនត្រូវបានគេមើលឃើញថាមានការពេញចិត្តជាងនៅក្នុងចំនួន ៧។

មជ្ឈមណ្ឌលស្រាវជ្រាវនេះ ពុំបានផ្តល់ការពន្យល់ច្បាស់លាស់សម្រាប់ការផ្លាស់ប្តូរនោះទេ ប៉ុន្តែលោកស្រី Laura Silver នាយករងនៃមជ្ឈមណ្ឌលនេះបាននិយាយថា វាអាចទៅរួចដែលថាទស្សនៈវិស័យនៃប្រទេសមួយអាចនឹងផ្លាស់ប្តូរនៅពេលដែលប្រទេសមហាអំណាចមួយផ្សេងទៀតផ្លាស់ប្តូរ។

លោកស្រី Silver បាននិយាយថា នៅពេលដែលសហរដ្ឋអាមេរិកមានសក្តានុពលមើលទៅដូចជាដៃគូដែលមិនសូវគួរឱ្យទុកចិត្ត ហើយទំនុកចិត្តរបស់ប្រជាជនមានកម្រិត ឧទាហរណ៍នៅក្នុងអាណត្តិលោក Trump ដើម្បីដឹកនាំសេដ្ឋកិច្ចពិភពលោក ប្រទេសចិនអាចមើលទៅខុសគ្នានៅក្នុងភ្នែករបស់មនុស្សមួយចំនួន ។

ជាការប្រៀបធៀប ៣២%មានទស្សនវិស័យវិជ្ជមានគាំទ្រចិន កើនឡើងជាងឆ្នាំមុនដែលមានត្រឹមតែ២៣% ។ចំណែក២៤%និយាយថា ពួកគេទុកចិត្តលោក Trump ធៀបទៅនឹង៥៣%កាលពីឆ្នាំមុនសម្រាប់លោក Biden៕