ភ្នំពេញ៖ លោក Heesuk Lee ប្រធានក្រុមហ៊ុន Korea Indochina Cooperation Center បានបន្ដឧបត្ថម្ភគ្រឿងឧបភោគបរិភោគ និងម៉ាស់ដល់មជ្ឈមណ្ឌលជាតិហ្វឹកហ្វឺនកីឡា ដើម្បីរួមចំណែកសម្រួលដល់ការប្រើប្រាស់ប្រចាំថ្ងៃ របស់ក្រុមជម្រើសជាតិទាំងអស់ដែលកំពុងបិទខ្ទប់ប្រមូលផ្ដុំហ្វឹកហាត់ នៅពហុកីឡដ្ឋានជាតិមរតកតេជោ។
លោក ប៊ុន សុខ ប្រធានមជ្ឈមណ្ឌលជាតិហ្វឹកហ្វឹកកីឡាបានឲ្យដឹងថា ការឧបត្ថម្ភនេះផ្ដើមចេញតាមរយៈឯកឧត្តម អ៊ូ រតនា ប្រធានសហព័ន្ធកីឡាវ៉ូវីណាម ដែលបានកៀគរសប្បុរសធម៌ជួយឧបត្ថម្ភជាសម្ភារៈ គ្រឿងឧបភោគបរិភោគ និងផ្សេងៗទៀត ជាក់ស្ដែងក្រុមហ៊ុនកូរ៉េនេះបានផ្ដល់នូវការឧបត្ថម្ភគីមឈី (Kimchi) ចំនួន ៣០០គីឡូក្រាម និងម៉ាស់ ៥០ប្រអប់សម្រាប់កីឡាករ-កីឡាការិនីទាំងអស់ប្រើប្រាស់។ អ្វីដែលពិសេសកន្លងមកក្រុមហ៊ុនក៏បានផ្ដល់នូវការបាញ់ថ្នាំសម្លាប់មេរោគ និងសន្យាផ្ដល់នូវការឧបត្ថម្ភនេះរៀងរាល់ ១ខែម្ដងទៀតផង។ ទន្ទឹមជាមួយគ្នាឯកឧត្ដម អ៊ូ រតនា បានសម្ដែងនូវការសប្បាយចិត្តដែលលោក Heesuk Lee តែងគិតគូរ និងរួមចំណែកលើកស្ទួយវិស័យកីឡាកម្ពុជាតាមរយៈការឧបត្ថម្ភជាបន្ដបន្ទាប់ ជាក់ស្ដែងក្រុមហ៊ុនបានឧបត្ថម្ភមជ្ឈមណ្ឌលចំនួន ៤លើករួចមកហើយក្នុងនោះក៏ធ្លាប់ឧបត្ថម្ភសហព័ន្ធកីឡាវ៉ូវីណាម ២លើកផងដែរ។ លោកបានចាត់ទុកការរួមចំណែកនេះគឺជាកត្ដាដ៏សំខាន់ ដើម្បីជំរុញវិស័យកីឡាជាតិកម្ពុជាឆ្ពោះទៅរកភាពជោគជ័យ និងឧត្ដមភាពនៅស៊ីហ្គេមឆ្នាំ២០២៣។
គួរដឹងថា បច្ចុប្បន្នមានក្រុមជម្រើសជាតិចំនួន ១៦ប្រភេទកីឡាកំពុងប្រមូលផ្ដុំហ្វឹកហាត់នៅពហុកីឡដ្ឋានជាតិមរតកតេជោ ក្រោមការយកចិត្តទុកដាក់រាជរដ្ឋាភិបាលតាមរយៈក្រសួងអប់រំ យុវជន និងកីឡា។ ទន្ទឹមជាមួយគ្នា ថ្នាក់ដឹកនាំសហព័ន្ធកីឡាជាតិនីមួយៗក៏បានយកចិត្តទុកដាក់ និងបានកៀគរសប្បុរសធម៌ដើម្បីជួយឧបត្ថម្ភគាំទ្របន្ថែម ជាក់ស្ដែងសហព័ន្ធកីឡាវ៉ូវីណាមក្រៅពីកៀគរសប្បុរសជនគាំទ្រក្រុមជម្រើសជាតិខ្លួន សហព័ន្ធក៏បានស្វែងរកការគាំទ្របន្ថែមដល់មជ្ឈមណ្ឌលជាតិហ្វឹកហ្វឺនកីឡា ដើម្បីដំណើរឆ្ពោះទៅមុខទាំងអស់គ្នាផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
