ប្រធានគោលនយោបាយការបរទេស លោកស្រី Kaja Kallas បាននិយាយកាលពីថ្ងៃអង្គារ ទី១៥ កក្កដា ថា សហភាពអឺរ៉ុបកំពុងរក្សាទ្វារឲ្យនៅបើកចំហចំពោះចំណាត់ការដែលអាចធ្វើទៅបានប្រឆាំងអ៊ីស្រាអែល ប្រសិនបើលក្ខខណ្ឌនានាសម្រាប់ផ្នែកមនុស្សធម៌នៅក្នុងតំបន់ហ្កាហ្សាពុំបានប្រសើរឡើង។

លោកស្រីKallas បានបង្ហាញជម្រើសចំនួន១០សម្រាប់ចំណាត់ការ បន្ទាប់ពីអ៊ីស្រាអែលត្រូវបានគេរកឃើញថាបានបំពានកិច្ចព្រមព្រៀងសហប្រតិបត្តិការជាមួយសហភាពអឺរ៉ុបជុំវិញការព្រួយបារម្ភសិទ្ធិមនុស្ស។ ចំណាត់ការនេះរួមមានការផ្អាកកិច្ចព្រមព្រៀង ការរឹតត្បិតពាណិជ្ជកម្ម ការដាក់ទណ្ឌកម្មលើមន្ត្រីអ៊ីស្រាអែល ការដាក់បម្រាមអាវុធ និងបញ្ឈប់ការធ្វើដំណើរដោយគ្មានទិដ្ឋាការ។



ទោះបីជាមានការរិះគន់កាន់តែខ្លាំងឡើងជុំវិញការបំផ្លិចបំផ្លាញនៅតំបន់ហ្កាហ្សា កិច្ចប្រជុំរដ្ឋមន្ត្រីការបរទេសសហភាពអឺរ៉ុបនៅទីក្រុងប្រ៊ុចសែល ពុំបានប្រមូលផ្តុំការគាំទ្រឲ្យគ្រប់គ្រាន់ដើម្បីអនុវត្តវិធានការណាមួយឡើយ។

លោកស្រី Kallas បានប្រាប់អ្នកសារព័ត៌មានថា «យើងនឹងរក្សាជម្រើសទាំងនេះនៅលើតុ ហើយត្រៀមខ្លួនដើម្បីដាក់ចេញចំណាត់ការ ប្រសិនបើអ៊ីស្រាអែលមិនធ្វើតាមការសន្យារបស់ខ្លួន»។ «គោលបំណងគឺពុំមែនដើម្បីដាក់ទណ្ឌកម្មលើអ៊ីស្រាអែលទេ។ គោលបំណងគឺពិតជាធ្វើឱ្យស្ថានភាពនៅតំបន់ហ្កាហ្សាប្រសើរឡើង»។

កាលពីសប្តាហ៍មុន លោកស្រី Kallas បានប្រកាសកិច្ចព្រមព្រៀងមួយជាមួយអ៊ីស្រាអែល ដើម្បីបើកច្រកឆ្លងកាត់ព្រំដែន និងអនុញ្ញាតឲ្យមានស្បៀងអាហារបន្ថែមទៀតចូលទៅក្នុងតំបន់ហ្កាហ្សា។ លោកស្រីនិយាយថាមាន «សញ្ញាវិជ្ជមានមួយចំនួន» រួមមានការស្ដារឡើងវិញបណ្តាញអគ្គិសនី ការផ្តល់ទឹក និងការបង្កើនការដឹកជញ្ជូនជំនួយមនុស្សធម៌។