ប្រទេសជាច្រើននៅអឺរ៉ុប បាននិយាយកាលពីថ្ងៃអង្គារ ទី១៥ ខែកក្កដា ថា ពួកគេមានឆន្ទៈក្នុងការទិញសព្វាវុធរបស់សហរដ្ឋអាមេរិកសម្រាប់អ៊ុយក្រែនក្រោមផែនការដែលត្រូវបានប្រកាសដោយប្រធានាធិបតីអាមេរិក លោក Donald Trump ។

លោក Trump បាននិយាយថា ទីក្រុងវ៉ាស៊ីនតោននឹងផ្គត់ផ្គង់ប្រព័ន្ធការពារដែនអាកាសប៉ាទ្រីយ៉ូត(Patriot) មីស៊ីល និងសព្វាវុធផ្សេងទៀតដល់ប្រទេសអ៊ុយក្រែនសម្រាប់សង្គ្រាមប្រឆាំងការឈ្លានពានរបស់រុស្ស៊ី ហើយអាវុធនឹងត្រូវបានចំណាយដោយប្រទេសណាតូផ្សេងទៀត។

ប៉ុន្តែនៅពុំទាន់ដឹងច្បាស់នៅឡើយអំពីចំនួន និងប្រភេទអាវុធស៊ីបគោលដៅដែលត្រូវផ្តល់ឱ្យ និងរបៀបដែលពួកគេនឹងត្រូវផ្គត់ផ្គង់បានលឿនប៉ុណ្ណា និងរបៀបដែលត្រូវចំណាយ។

មន្ត្រីអាមេរិកបាននិយាយថា បណ្តាប្រទេសនៅអឺរ៉ុបនឹងសុខចិត្តលះបង់ការស្តុកទុកអាវុធផ្ទាល់ខ្លួនមួយចំនួនសម្រាប់អ៊ុយក្រែន ហើយក្រោយមកទិញដាក់ជំនួសមកពីសហរដ្ឋអាមេរិក។

ចំណាត់ការបែបនេះនឹងអាចឲ្យអ៊ុយក្រែនទទួលបានអាវុធកាន់តែលឿន ប៉ុន្តែនឹងធ្វើឱ្យផ្នែកការពារជាតិរបស់ប្រទេសម្ចាស់ជំនួយ ត្រូវបញ្ចេញបន្ថែមទៀត រហូតដល់ប្រព័ន្ធថ្មីរួចរាល់។

រដ្ឋមន្ត្រីការបរទេសដាណឺម៉ាក លោក Lars Lokke Rasmussen បានប្រាប់អ្នកសារព័ត៌មាននៅទីក្រុងព្រុចសែលកាលពីថ្ងៃអង្គារថា «យើងត្រៀមរួចរាល់ដើម្បីចូលរួម។ ពិតណាស់ យើងមិនអាចធ្វើវាតែម្នាក់ឯងទេ យើងត្រូវការអ្នកផ្សេងទៀតធ្វើជាដៃគូ ប៉ុន្តែយើងមានការត្រៀមខ្លួនជាស្រេច» ។