រដ្ឋបាលរបស់ប្រធានាធិបតីសហរដ្ឋអាមេរិក លោក Donald Trump បានអំពាវនាវឱ្យអ៊ីស្រាអែល ស៊ើបអង្កេតការសម្លាប់ពលរដ្ឋអាមេរិកអាយុ ២០ឆ្នាំ ឈ្មោះ Sayfollah Musallet ដែលត្រូវបានគេវាយដំរហូតដល់ស្លាប់ធ្វើឡើងដោយអ្នកតាំងលំនៅនៅតំបន់កាន់កាប់ West Bank ដោយចាត់ទុកឧបទ្ទវហេតុនេះថាជា «អំពើភេរវកម្ម»។

លោក Mike Huckabee ឯកអគ្គរដ្ឋទូតសហរដ្ឋអាមេរិកប្រចាំប្រទេសអ៊ីស្រាអែល បាននិយាយកាលពីថ្ងៃអង្គារថា លោកបានស្នើឱ្យអ៊ីស្រាអែល «ស៊ើបអង្កេតឲ្យបានហ្មត់ចត់» ចំពោះការសម្លាប់ Musallet កើតនៅរដ្ឋ Florida ដែលបានទៅសួរសុខទុក្ខក្រុមគ្រួសារ នៅពេលនោះត្រូវបានគេវាយដំនៅទីក្រុង Sinjil ដែនដីប៉ាឡេស្ទីន។

លោក Huckabee បានសរសេរនៅក្នុងការបង្ហោះលើបណ្តាញផ្សព្វផ្សាយសង្គមថា «ត្រូវតែមានការទទួលខុសត្រូវចំពោះឧក្រិដ្ឋកម្ម និងអំពើភេរវកម្មនេះ ដែល Saif ទើបតែមានអាយុ២០ ឆ្នាំប៉ុណ្ណោះ។

ការបង្ហោះដែលប្រើពាក្យសម្តីធ្ងន់ៗរបស់ លោក Huckabee បង្ហាញពីជំហរហ្មត់ចត់ដ៏កម្រចំពោះអ៊ីស្រាអែល ដោយបេសកជនសហរដ្ឋអាមេរិក ជាអ្នកធ្លាប់គាំទ្រអ៊ីស្រាអែលដ៏រឹងមាំ។

ប៉ុន្តែសេចក្តីថ្លែងការណ៍របស់ឯកអគ្គរដ្ឋទូតអាមេរិករូបនេះ មិនបានគាំទ្រចំពោះការទាមទាររបស់គ្រួសារ Musallet ដែលតម្រូវឲ្យទីក្រុងវ៉ាស៊ីនតោនចាប់ផ្តើមការស៊ើបអង្កេតផ្ទាល់ លើឃាតកម្មនេះទេ។

ក្រុមអ្នករិះគន់និយាយថា អ៊ីស្រាអែលកម្រនឹងនាំអ្នកតាំងលំនៅ ឬទាហានរបស់ខ្លួនឲ្យមកទទួលខុសត្រូវណាស់ចំពោះការរំលោភបំពានលើពលរដ្ឋប៉ាឡេស្ទីន។ Musallet គឺជាពលរដ្ឋអាមេរិកទី៩ដែលត្រូវបានសម្លាប់ដោយអ៊ីស្រាអែលចាប់តាំងពីឆ្នាំ២០២២ ហើយគ្មានករណីមុនៗណាមួយដែលនាំទៅរកការចោទប្រកាន់បទឧក្រិដ្ឋកម្មឡើយ។