ទេសរដ្ឋមន្ត្រីរបស់ប្រទេសសិង្ហបុរី លោក Lee Hsien Loong បាននិយាយកាលពីថ្ងៃអង្គារ (១៥ កក្កដា) ថា ពិភពលោកនឹងមិនវិលត្រលប់ទៅរក “ស្ថានភាពដើម” ឬដូចទៅនឹងស្ថានការណ៍មុនពេលលោកប្រធានាធិបតីអាមេរិក Donald Trump ចាប់ផ្តើមដំឡើងពន្ធសកលបាននោះឡើយ ហើយផលប៉ះពាល់ពីរបាំងពាណិជ្ជកម្មបែបនេះក៏មិនមែនជារឿងបណ្ដោះអាសន្នដែរ។

ថ្លែងនៅក្នុងកិច្ចសន្ទនាដ៏ទូលំទូលាយមួយ ដែលបានចូលទៅក្នុងភូមិសាស្ត្រនយោបាយ បម្រែបម្រួលអាកាសធាតុ និងបញ្ហាក្នុងស្រុកនៅឯពិធីអាហារពេលល្ងាចមួយរៀបចំឡើងដោយសមាគមសេដ្ឋកិច្ចសិង្ហបុរី (ESS) លោក Lee បានបន្ថែមថា "នៅពេលដែលមានការផ្លាស់ប្តូររួចហើយនៅក្នុងគោលនយោបាយពាណិជ្ជកម្ម ឬគោលនយោបាយសេដ្ឋកិច្ច គឺមិនអាចយកមកវិញដោយងាយបានទេ ហើយមានផលវិបាកច្រើនណាស់"។

ការអត្ថាធិប្បាយរបស់មន្រ្តីជាន់ខ្ពស់សិង្ហបុរីរូបនេះធ្វើឡើងឆ្លើយតបទៅនឹងការលើកឡើងថា ផលប៉ះពាល់នៃពន្ធអាចជារឿងបណ្តោះអាសន្ន ឬក៏មានត្រឹមតែពេលដែលប្រធានាធិបតីអាមេរិបកបច្ចុប្បន្នកំពុងកាន់តំណែងប៉ុណ្ណោះ។

គួរឱ្យដឹងថា ទោះជាសិង្ហបុរី មានកិច្ចព្រមព្រៀងពាណិជ្ជកម្មសេរីជាមួយសហរដ្ឋអាមេរិកក៏ដោយ ក៏ទីក្រុងវ៉ាស៊ីនតោននៅតែសម្រេចចិត្តថា សិង្ហបុរីនឹងប្រឈមមុខនឹងពន្ធមូលដ្ឋាន ១០%។ ទាក់ទងនឹងពន្ធមូលដ្ឋាននេះ លោក Lee បាននិយាយថា "សិង្ហបុរីនឹងនិយាយលួងខ្លួនឯងថានោះគឺជាអត្រាល្អបំផុត ហើយក៏សង្ឃឹមថា សិង្ហបុរីបន្តនៅចំណុចនេះរហូតដែរ"៕