អ្នកកាសែតម្នាក់របស់សារព័ត៌មានអាមេរិក Axios បាននិយាយលើបណ្ដាញសង្គម X ថា ប្រធានាធិបតីអាមេរិក លោក Donald Trump នឹងជួបជាមួយនាយករដ្ឋមន្រ្តីកាតា លោក Sheikh Mohammed bin Abdulrahman al-Thani នៅថ្ងៃពុធ (១៦ កក្កដា) នេះ ដើម្បីពិភាក្សាពីការចរចាលើកិច្ចព្រមព្រៀងបទឈប់បាញ់ក្នុងសង្រ្គាមដែនដីហ្កាហ្សា។

អ្នកចរចាអ៊ីស្រាអែល និងក្រុមហាម៉ាស បានចូលរួមក្នុងកិច្ចចរចាបទឈប់បាញ់ចុងក្រោយនៅទីក្រុងដូហា ចាប់តាំងពីថ្ងៃទី០៦ ខែកក្កដា មក ដោយពិភាក្សាលើសំណើដែលគាំទ្រដោយសហរដ្ឋអាមេរិក សម្រាប់បទឈប់បាញ់ ៦០ថ្ងៃ ដែលរួមមានការដោះលែងចំណាប់ថ្នូរជាដំណាក់កាល ការដកទ័ពអ៊ីស្រាអែលចេញពីផ្នែកខ្លះនៃតំបន់ហ្កាហ្សា និងការពិភាក្សាអំពីការបញ្ចប់ជម្លោះទាំងស្រុង។

បេសកជនមជ្ឈិមបូព៌ារបស់អាមេរិក លោក Steve Witkoff បាននិយាយកាលថ្ងៃអាទិត្យចុងសប្ដាហ៍មុនថា លោកមាន "ក្តីសង្ឃឹមខ្ពស់ណាស់" លើការចរចាបទឈប់បាញ់នៅកាតា ដែលជាអ្នកសម្របសម្រួលដ៏សំខាន់រវាងភាគីជម្លោះទាំងពីរ។ អ្នកសម្រុះសម្រួលរបស់អាមេរិក កាតា និងអេហ្ស៊ីប បាននិងកំពុងប្រឹងប្រែងដើម្បីទទួលបានកិច្ចព្រមព្រៀងមួយ ប៉ុន្តែអ៊ីស្រាអែល និងក្រុមហាម៉ាស ខ្វែងគំនិតគ្នាយ៉ាងជ្រៅលើវិសាលភាពនៃការដកទ័ពអ៊ីស្រាអែល ចេញពីតំបន់ឡោមព័ទ្ធប៉ាឡេស្ទីនមួយនេះ។

បទឈប់បាញ់ចុងក្រោយបំផុតមួយកាលពី ២ខែមុន បានបញ្ចប់នៅពេលការវាយប្រហាររបស់អ៊ីស្រាអែល បានបន្តសម្លាប់ជនជាតិប៉ាឡេស្ទីនជាង ៤០០នាក់កាលពីថ្ងៃទី១៨ ខែមីនា។ លោក Trump កាលពីដើមឆ្នាំនេះ បានស្នើផែនការថាឱ្យអាមេរិក ចូលកាន់កាប់ហ្កាហ្សា នៅក្នុងគំនិតមួយដែលត្រូវថ្កោលទោសជាសកលដោយអ្នកជំនាញសិទ្ធិមនុស្ស អង្គការសហប្រជាជាតិ និងប៉ាឡេស្ទីន ថាជាសំណើនៃ "ការបោសសម្អាតជនជាតិភាគតិច"៕