មន្ត្រីជាន់ខ្ពស់របស់អង្គការសហប្រជាជាតិ បានព្រមានកាលពីថ្ងៃអង្គារ (១៥ កក្កដា) ថា ល្បឿន និងទំហំនៃជនភៀសខ្លួនអាហ្វហ្គានីស្ថាន រាប់លាននាក់ដែលចាកចេញពីអ៊ីរ៉ង់ ចូលទៅប្រទេសកំណើតវិញ កំពុងជួបហានិភ័យ ហើយអាចបង្កើនភាពធ្ងន់ធ្ងរដល់ប្រព័ន្ធគាំទ្រ ដែលផុយស្រួយស្រាប់ទៅហើយ ខណៈមនុស្សរាប់ម៉ឺននាក់ដែលឆ្លងកាត់ព្រំដែនជារៀងរាល់ថ្ងៃ ត្រូវពឹងផ្អែកលើជំនួយមនុស្សធម៌ បូករួមនឹងភាពហត់នឿយ និងភ័យខ្លាច។

មកទល់ពេលនេះ ប្រជាជនជាង ១,៤លាននាក់បានវិលត្រឡប់ ឬត្រូវបង្ខំឱ្យត្រឡប់ទៅអាហ្វហ្គានីស្ថានវិញ ដោយក្នុងនោះមានជាង ១លាននាក់មកពីអ៊ីរ៉ង់។ អ៊ីរ៉ង់ និងប៉ាគីស្ថាន ក្នុងឆ្នាំ២០២៣ បានចាប់ផ្តើមយុទ្ធនាការដាច់ដោយឡែកមួយដើម្បីបណ្តេញជនបរទេស ដែលពួកគេនិយាយថាកំពុងរស់ក្នុងប្រទេសដោយខុសច្បាប់ ហើយបដិសេធថាមិនកំណត់គៅលដៅលើជនអាហ្វហ្គានីស្ថានទេ។

តំណាងពិសេសរបស់អង្គការសហប្រជាជាតិទទួលបន្ទុកអាហ្វហ្គានីស្ថាន លោកស្រី Roza Otunbayeva បានអំពាវនាវឱ្យមានការគាំទ្រជាបន្ទាន់ពីអន្តរជាតិសម្រាប់អាហ្វហ្គានីស្ថាន បន្ទាប់ពីដំណើរទស្សនកិច្ចទៅច្រកព្រំដែន Islam Qala ក្នុងខេត្ត Herat ភាគខាងលិចក្បែរអ៊ីរ៉ង់។ លោកស្រីបន្តថា បើពុំមានអន្តរាគមន៍ភ្លាមៗទេ ការខាតបង់លើការផ្ទេរប្រាក់ សម្ពាធទីផ្សារការងារ និងចំណាកស្រុកវិលជុំ នឹងនាំទៅរកផលវិបាកដ៏មហន្តរាយ។

គួរឱ្យដឹងថា ជនជាតិអាហ្វហ្គានីស្ថានភាគច្រើនពឹងផ្អែកលើជំនួយមនុស្សធម៌ដើម្បីរស់រាន ប៉ុន្តែការកាត់មូលនិធិយ៉ាងជ្រៅទូទាំងសកលលោក កំពុងធ្វើឱ្យស្ថានការណ៍កាន់តែអាក្រក់ឡើង ដោយភ្នាក់ងារជំនួយ និងអង្គការមិនមែនរដ្ឋាភិបាលបានបង្ខំចិត្តកាត់បន្ថយកម្មវិធីអប់រំ និងការថែទាំសុខភាពសម្រាប់ប្រទេសដែលជួបវិបត្តិមួយនេះ៕