នាយករដ្ឋមន្ត្រីអ៊ីរ៉ាក់លោក Mohammed Shia al-Sudani បាននិយាយនៅក្នុងបទសម្ភាសន៍ជាមួយសារព័ត៌មានអារ៉ាប់ Asharq al-Awsat ថា នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) ទំនងជានឹងបញ្ជាឲ្យមានការវាយប្រហារថ្មីលើទឹកដីអ៊ីរ៉ង់ ដើម្បីការពារស្ថិរភាពក្នុងតំបន់ និងរក្សាការក្តាប់អំណាចរបស់លោក។ 

មេដឹកនាំអ៊ីរ៉ាក់រូបនេះ បាននិយាយនៅពេលសួរអំពីលទ្ធភាពនៃការកើនឡើងភាពតានតឹងជាថ្មីរវាងអ៊ីរ៉ង់ និងអ៊ីស្រាអែលថា៖«មនុស្សគ្រប់គ្នាដឹងថា លោក ណេតាន់យ៉ាហ៊ូ បានរំលោភលើកិច្ចព្រមព្រៀងឈប់បាញ់នៅក្នុងតំបន់ហ្កាហ្សា និងលីបង់។ នេះគឺជាលទ្ធភាព ដែលលោកអាចនឹងវាយប្រហារអ៊ីរ៉ង់ម្ដងទៀត ហើយយុទ្ធសាស្ត្រនយោបាយរបស់លោក គឺបន្តជម្លោះក្នុងតំបន់ ដើម្បីរក្សាជំហរនយោបាយខ្លួន។

លោក Al-Sudani បានកត់សម្គាល់ឃើញថា ក្នុងអំឡុងពេលនៃការវាយប្រហារគ្នារវាងអ៊ីរ៉ង់ និងអ៊ីស្រាអែលនាពេលថ្មីៗនេះ ថ្នាក់ដឹកនាំអ៊ីរ៉ាក់ មានការព្រួយបារម្ភយ៉ាងខ្លាំងអំពីស្ថិរភាពក្នុងតំបន់ និងស្ថានភាពនៅជិតព្រំដែនរបស់ខ្លួន។ អ្នកនយោបាយរូបនេះ បានបន្ថែមថា៖ «អ្នកមិនអាចឈរមើលប្រទេសជិតខាងឆេះ បានទេ ហើយនៅមានទំនុកចិត្តថា ភ្លើងនឹងមិនរាលដាលដល់អ្នកទេ»។

នៅយប់ថ្ងៃទី ១៣ ខែមិថុនា អ៊ីស្រាអែល បានចាប់ផ្តើមយុទ្ធនាការយោធាប្រឆាំងនឹងអ៊ីរ៉ង់។ តិចជាង ២៤ ម៉ោងក្រោយមក សាធារណរដ្ឋឥស្លាមនេះ បានធ្វើការវាយប្រហារសងសឹក។ សហរដ្ឋអាមេរិក បានចូលរួមក្នុងជម្លោះ រយៈពេល ៩ថ្ងៃ បន្ទាប់ពីការកើនឡើងភាពតានតឹង។ នៅព្រឹកព្រលឹមថ្ងៃទី២២ ខែមិថុនា យន្តហោះទម្លាក់គ្រាប់បែកអាមេរិក បានវាយប្រហារទីតាំងនុយក្លេអ៊ែរអ៊ីរ៉ង់ចំនួនបី។ នៅល្ងាចថ្ងៃទី ២៣ ខែមិថុនា ទីក្រុងតេហេរ៉ង់ បានបាញ់មីស៊ីលបាលីស្ទីកទៅលើមូលដ្ឋានទ័ពអាកាស Al-Udeid របស់សហរដ្ឋអាមេរិក ក្នុងប្រទេសកាតា ដែលជាទីតាំងដ៏ធំបំផុតនៅមជ្ឈិមបូព៌ា។ បើតាមអាជ្ញាធរអាមេរិក មិនមានអ្នកស្លាប់ ឬខូចខាតអ្វីគួរឲ្យកត់សម្គាល់ទេ។ ក្រោយមក ប្រធានាធិបតីអាមេរិក លោក ដូណាល់ ត្រាំ បានប្រកាសថា អ៊ីស្រាអែល និងអ៊ីរ៉ង់ បានយល់ព្រមលើបទឈប់បាញ់ពេញលេញ ដែលបានចូលជាធរមាន នៅថ្ងៃទី២៤ ខែមិថុនា។