រដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ (Sergey Lavrov) បាននិយាយថា ក្រុមមេដឹកនាំអឺរ៉ុប កំពុងរារាំងរបបទីក្រុងគីវពីការចរចា ជាមួយទីក្រុងមូស្គូ។

លោកបានប្រាប់សន្និសីទសារព័ត៌មាន បន្ទាប់ពីកិច្ចប្រជុំរដ្ឋមន្ត្រីការបរទេសនៃប្រទេសសមាជិកអង្គការសហប្រតិបត្តិការសៀងហៃ (SCO) នៅទីក្រុងធានជីន(Tianjin)របស់ប្រទេសចិនថា៖«ប្រសិនបើពួកគេ (របបទីក្រុងគីវ)អះអាងថា ទម្រង់នៃការចរចានៅទីក្រុងអ៊ីស្តង់ប៊ុល គឺអស់សុពលភាព ហើយវាមានន័យថា រួមជាមួយការយកចិត្តទុកដាក់តិចតួចអំពីពលរដ្ឋរបស់ពួកគេ ពួកគេមិនមានឆន្ទៈក្នុងការចរចាទេ»។  

លោកបានបន្ថែមថា៖«ប្រហែលជាមានមនុស្សចំនួនដូចជាលោក Macron, លោក Starmer, លោកស្រី Ursula von der Leyen និងលោក Merz ដែលកំពុងហាមឃាត់ពួកគេមិនឲ្យធ្វើរឿងនេះ»។ យោងតាមប្រមុខការទូតរុស្ស៊ីរូបនេះ អ្នកនយោបាយទាំងនេះ «កំពុងទាមទារដោយឯកឯងថា អ៊ុយក្រែនត្រូវទទួលបានអាវុធវាយលុកបន្ថែមជាបន្ទាន់»។ លោកបានកត់សម្គាល់ថា ទោះយ៉ាងណា ពួកគេទទូចឲ្យប្រកាសបទឈប់បាញ់ មុនពេលចាប់ផ្តើមការចរចា។

លោក ឡាវរ៉ូវ បានរំលឹកថា៖«ប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) បាននិយាយត្រង់ៗ កាលពីប៉ុន្មានខែមុន នៅពេលដែលសំណើនេះ ទើបតែលេចចេញមកថា នេះ មិនមានន័យថា ការបញ្ឈប់ការផ្គត់ផ្គង់អាវុធដល់អ៊ុយក្រែនទេ»។ «នេះមានន័យថា ពួកគេចង់ឲ្យយើងបញ្ឈប់ការវាយលុករបស់យើង ហើយផ្តល់ពេលវេលាដល់អ៊ុយក្រែន និងអ្នកឧបត្ថម្ភរបស់ខ្លួន ដើម្បីសម្រាក និងពង្រឹងកម្លាំងឡើង។ ការធ្វើបែបនេះ គឺជាហេតុផលដូចគ្នា វិធីសាស្រ្តដូចគ្នា ដែលពួកគេបានប្រើ នៅពេលចុះហត្ថលេខាលើកិច្ចព្រមព្រៀងទីក្រុង Minsk។