លោក Donald Trump កាលពីថ្ងៃអង្គារ (ទី១៥ ខែកក្កដា) បានបញ្ជាក់ថា អ៊ុយក្រែនមិនគួរកំណត់គោលដៅលើទីក្រុងមូស្គូនោះទេ ហើយថា លោកក៏មិនមានគម្រោងផ្គត់ផ្គង់ទីក្រុងគីវ ជាមួយនឹងមីស៊ីលរយៈចម្ងាយឆ្ងាយនោះដែរ បន្ទាប់ពីមានរបាយការណ៍មួយ ដែលថា មេដឹកនាំសហរដ្ឋអាមេរិករូបនេះ បានជំរុញឲ្យប្រធានាធិបតី លោក Volodymyr Zelenskyy វាយប្រហាររដ្ឋធានីរបស់រុស្ស៊ី។

សារព័ត៌មាន Financial Times (FT) បានរាយការណ៍ថា លោក Trump បានពិភាក្សាអំពីលទ្ធភាពនៃការវាយបកជាមួយលោក Zelenskyy ហើយថែមទាំងបានសួរសមភាគីអ៊ុយក្រែនថា តើលោកអាចវាយប្រហារទីក្រុងមូស្គូបានដែរ ឬទេ ប្រសិនបើទីក្រុងវ៉ាស៊ីនតោនផ្តល់អាវុធរយៈចម្ងាយឆ្ងាយ។

នៅពេលត្រូវបានសួរដោយអ្នកសារព័ត៌មាននៅសេតវិមានថា តើលោក Zelenskyy គួរកំណត់គោលដៅរដ្ឋធានីរុស្ស៊ី ឬអត់នោះ លោក Trump បានឆ្លើយតបថា «ទេ គាត់ (លោក Zelenskyy) មិនគួរកំណត់គោលដៅទីក្រុងមូស្គូទេ»។ លោក Trump ក៏ត្រូវបានសួរផងដែរថា តើលោកមានឆន្ទៈផ្គត់ផ្គង់អ៊ុយក្រែនជាមួយនឹងមីស៊ីលរយៈចម្ងាយឆ្ងាយដែរ ឬទេ ហើយលោកបានឆ្លើយតបថា «ទេ យើងមិនស្វែងរកការធ្វើបែបនេះឡើយ»។

គួរបញ្ជាក់ថា ដោយដកស្រង់ប្រភពចំនួន ២រូបដែលដឹងពីការសន្ទនាតាមទូរសព្ទ សារព័ត៌មាន FT បានរាយការណ៍ថា លោក Trump បានជជែកជាមួយលោក Zelenskyy កាលថ្ងៃទី៤ ខែកក្កដា ពោលគឺមួយថ្ងៃបន្ទាប់ពីមានការពិភាក្សាជាមួយប្រធានាធិបតីរុស្ស៊ី លោក Vladimir Putin។ សារព័ត៌មាន FT បានឲ្យដឹងបន្ថែមថា លោក Trump ក៏ត្រូវបានរាយការណ៍ដែរថា បានពិភាក្សាអំពីការបញ្ជូនឲ្យអ៊ុយក្រែននូវមីស៊ីល ATACMS ដែលផលិតដោយសហរដ្ឋអាមេរិក៕