កិច្ចប្រជុំរួមគ្នានាពេលខាងមុខ រវាងរដ្ឋមន្ត្រីការបរទេស និងសេដ្ឋកិច្ចរបស់អាស៊ាន (ASEAN) គឺជារឿងដ៏កម្រមួយ ដោយក្រុមអ្នកវិភាគ បានចាត់ទុកការមានឡើងវិញនេះថា ជា «ការផ្លាស់ប្តូរដ៏សំខាន់» នៅក្នុងយុទ្ធសាស្ត្ររបស់ប្លុក និងជាការឆ្លើយតបទៅនឹង «ទិដ្ឋភាពកាន់តែប្រែប្រួលរបស់សកលលោក»។ 

កិច្ចប្រជុំរួមដ៏កម្រនេះ បានកើតឡើងលើកដំបូងនៅក្នុងឆ្នាំ១៩៩៩ ហើយកិច្ចប្រជុំស្រដៀងគ្នានេះ ត្រូវបានគ្រោងទុកក្នុងឆ្នាំ២០០៣ តែមិនមានការកត់ត្រាជាសាធារណៈ ដែលថា វាបានកើតឡើងនោះឡើយ។ នេះមានន័យថា កិច្ចប្រជុំនាពេលខាងមុខ អាចជាលើកដំបូងក្នុងរយៈពេល ២៦ឆ្នាំ។

កិច្ចប្រជុំនាពេលខាងមុខ ត្រូវបានបង្ហាញឲ្យដឹងកាលពីថ្ងៃសុក្រសប្តាហ៍មុន ដោយរដ្ឋមន្ត្រីការបរទេសម៉ាឡេស៊ី លោក Mohamad Hasan បន្ទាប់ពីមានកិច្ចប្រជុំជាមួយសមភាគីរបស់សមាគមប្រជាជាតិអាស៊ីអាគ្នេយ៍ (អាស៊ាន) ដោយនិយាយថា វានឹងមានគោលបំណងជួយឲ្យបណ្តាប្រទេសអាស៊ីអាគ្នេយ៍ធ្វើការរួមគ្នាកាន់តែប្រសើរឡើង ដើម្បីដោះស្រាយបញ្ហាសេដ្ឋកិច្ច និងភាពតានតឹងពាណិជ្ជកម្មដែលកំពុងកើនឡើងនៅក្នុងតំបន់។

តែយ៉ាងណាក្ដី កិច្ចប្រជុំរយៈពេល ៤ថ្ងៃ បានធ្វើឡើងចំពេលមានភាពមិនច្បាស់លាស់ខាងភូមិសាស្ត្រនយោបាយ និងពាណិជ្ជកម្ម ខណៈដែលប្រធានាធិបតីសហរដ្ឋអាមេរិកលោក Donald Trump បានប្រកាសកែសម្រួលពន្ធលើប្រទេសនានា ក្នុងនោះរួមទាំងប្រទេសនៅក្នុងតំបន់អាស៊ីអាគ្នេយ៍ផងដែរ។

អ្នកវិភាគបានពណ៌នាការមានឡើងវិញនូវកិច្ចប្រជុំនេះថា ជាការផ្លាស់ប្តូរឆ្ពោះទៅរក «ការអនុវត្តជាយុទ្ធសាស្ត្រ» ពោលគឺឆ្លុះបញ្ចាំងពីការយល់ដឹងកាន់តែខ្ពស់របស់អាស៊ាន ដែលថា ការសម្រេចចិត្តផ្នែកសេដ្ឋកិច្ចមិនអាចកាត់ផ្ដាច់ពីការពិតនយោបាយបានទៀតទេ ហើយពួកគេមិនអាចធ្វើការដាច់ដោយឡែកពីគ្នាបានទៀតឡើយ។

កាលបរិច្ឆេទនៃកិច្ចប្រជុំរួមនេះ មិនទាន់ត្រូវបានកំណត់នៅឡើយទេ ប៉ុន្តែវានឹងមាននៅមុនពេលកិច្ចប្រជុំកំពូលរបស់មេដឹកនាំដែលគ្រោងនឹងធ្វើឡើងនៅទីក្រុងគូឡាឡាំពួ ប្រទេសម៉ាឡេស៊ី ចាប់ពីថ្ងៃទី២៦ ដល់ថ្ងៃទី២៨ ខែតុលា៕