អ្នកជំនាញមានជំហរមិនចុះញ៉មរបស់អង្គការសហប្រជាជាតិ (UN) ទទួលបន្ទុកកិច្ចការប៉ាឡេស្ទីន គឺលោកស្រី Francesca Albanese កាលពីថ្ងៃអង្គារ (ទី១៥ ខែកក្កដា) បានលើកឡើងថា ការប្រកាសដាក់ទណ្ឌកម្មរបស់ទីក្រុងវ៉ាស៊ីនតោន បន្ទាប់ពីមានការរិះគន់របស់លោកស្រី ចំពោះជំហររបស់សេតវិមានលើតំបន់ហ្កាហ្សា គឺជា «ការរំលោភ» លើអភ័យឯកសិទ្ធិរបស់លោកស្រី។

អ្នករាយការណ៍ពិសេសរបស់ UN ស្តីពីដែនដីកាន់កាប់ប៉ាឡេស្ទីន បានធ្វើការអត្ថាធិប្បាយបែបនេះ អំឡុងពេលបំពេញទស្សនកិច្ច នៅទីក្រុង Bogota ពោលគឺជិត ១សប្តាហ៍បន្ទាប់ពីរដ្ឋមន្ត្រីការបរទេសអាមេរិក លោក Marco Rubio បានប្រកាសពីការដាក់ទណ្ឌកម្មលើលោកស្រី ដោយចាត់ទុកការបំពេញការងាររបស់លោកស្រីថា មាន «ភាពលម្អៀង និងបង្កប់គំនិតព្យាបាទ»។

លោកស្រី Albanese បានប្រាប់អ្នកចូលរួមនៅរដ្ឋធានីរបស់ប្រទេសកូឡុំប៊ីថា៖ «វាជាវិធានការដ៏ធ្ងន់ធ្ងរ។ វាមិនធ្លាប់មានពីមុនមកឡើយ។ ហើយខ្ញុំយកចិត្តទុកដាក់យ៉ាងខ្លាំង»។ លោកស្រីកំពុងស្ថិតនៅក្នុងទីក្រុង Bogota ដើម្បីចូលរួមកិច្ចប្រជុំកំពូលអន្តរជាតិមួយ ដែលផ្តួចផ្តើមដោយប្រធានាធិបតីឆ្វេងនិយម លោក Gustavo Petro ដើម្បីស្វែងរកដំណោះស្រាយ ចំពោះជម្លោះ នៅតំបន់ហ្កាហ្សា។

អ្នកជំនាញផ្នែកច្បាប់ និងសិទ្ធិមនុស្សសញ្ជាតិអ៊ីតាលីរូបនេះ បានប្រឈមនឹងការរិះគន់យ៉ាងខ្លាំង ដោយសារការចោទប្រកាន់របស់លោកស្រីជាយូរមកហើយ ដែលថា អ៊ីស្រាអែលកំពុងប្រព្រឹត្ត «អំពើប្រល័យពូជសាសន៍» នៅក្នុងតំបន់ហ្កាហ្សា។

ពាក់ព័ន្ធនឹងការដាក់ទណ្ឌកម្មនោះ លោកស្រី Albanese បានប្រាប់ថា៖ «វាជាការរំលោភយ៉ាងច្បាស់ក្រឡែត លើអនុសញ្ញា UN ស្តីពីសិទ្ធិ និងអភ័យឯកសិទ្ធិ ដែលការពារមន្ត្រី UN ក្នុងនោះរួមទាំងអ្នកជំនាញឯករាជ្យផងដែរ កុំឲ្យរងនូវពាក្យសម្ដី និងការចាត់វិធានការនានា ពេលអនុវត្តការងាររបស់ពួកគេ»៕