ជនប៉ាឡេស្ទីនជម្លៀសខ្លួនពីទីក្រុង Rafah បានច្រានចោលគម្រោងរបស់អ៊ីស្រាអែល ក្នុងការផ្ទេរជនប៉ាឡេស្ទីនរាប់ម៉ឺននាក់ដែលត្រូវរំលើងគល់រួចទៅហើយនោះ ទៅកាន់ទីក្រុងមនុស្សធម៌នៅតំបន់ហ្កាហ្សា ដោយពួកគេបង្ហាញក្តីសង្ឃឹមថា នឹងអាចវិលត្រឡប់ទៅកាន់ទីក្រុង Rafah និងសាងសង់ផ្ទះសម្បែងរបស់ពួកគេឡើងវិញ ។

គម្រោងមួយនេះ នាំឲ្យក្រុមអ្នកនយោបាយមានជម្លោះជាមួយគ្រឹះស្ថានការពារជាតិ ប៉ុន្តែក្រុមមន្រ្តី និយាយថា ផែនការជាក់ស្តែងនៅមិនទាន់រៀបចំឡើងនោះទេ ។

បើទោះបីជាពុំទាន់មានផែនការច្បាស់លាស់យ៉ាងណាក្តី ក្រុមអ្នករិះគន់ប្រឆាំង បានបរិហារសំណើមួយនេះ ក្នុងនោះក្រុមប្រឆាំងមួយចំនួនបានប្រដូចទីតាំងស្នើសុំនេះទៅនឹងបន្ទាយឃុំឃាំងមនុស្ស ដែលនាំឲ្យមានការបោសសម្អាតជនជាតិភាគតិចនៅដែនដីឡោមព័ទ្ធមួយនេះ ដែលរងខ្ទេចខ្ទាំដោយសារជម្លោះរយៈពេល ២១ខែ ។

រដ្ឋបាលរបស់លោកនាយករដ្ឋមន្រ្តី Benjamin Netanyahu បាននិយាយការពារគម្រោងមួយនេះ ដោយពួកគេបញ្ជាក់ថា វានឹងផ្តល់ជាឋានសួគ៌សុវត្ថិភាពដល់ជនស៊ីវិល ខណៈធ្វើឲ្យទន់ខ្សោយបន្ថែមទៀតកម្លាំងរបស់ក្រុមហាម៉ាសនៅតំបន់ហ្កាហ្សា ប៉ុន្តែគេនៅមិនទាន់ច្បាស់នោះទេថាតើ វាគឺជាគោលនយោបាយរឹងមាំរបស់រដ្ឋាភិបាលឬយ៉ាងណា ។

គំនិតមួយនេះ ត្រូវបានផ្តួចផ្តើមឡើងដោយរដ្ឋមន្រ្តីក្រសួងការពារជាតិអ៊ីស្រាអែលលោក Israel Katz កាលពីដើមខែនេះ ហើយលោក Netanyahu បានកោះប្រជុំរដ្ឋមន្រ្តីរូបនេះ និងក្រុមមន្រ្តីការពារជាតិ ដើម្បីពិភាក្សាលើសំណើមួយនេះ កាលពីយប់ថ្ងៃអាទិត្យកន្លងទៅ ៕