អ្នកឆ្លើយឆ្លងព័ត៌មានតំណាងឲ្យគេហទំព័រ Axios មានមូលដ្ឋាននៅអាមេរិក បានថ្លែងនៅលើគណនីបណ្តាញសង្គម X របស់ខ្លួនថា អ៊ីស្រាអែល បានសន្យាបញ្ឈប់ការវាយប្រហារលើទីតាំងយោធាស៊ីរី កាលពីថ្ងៃទី ១៥ ខែកក្កដា បន្ទាប់ពីមានសំណើពីរដ្ឋបាលរបស់ប្រធានាធិបតីអាមេរិក លោក ដូណាល់ ត្រាំ។ 

យោងតាមអ្នកឆ្លើយឆ្លងព័ត៌មាន រដ្ឋាភិបាលស៊ីរីបានជូនដំណឹងដល់អ៊ីស្រាអែលជាមុនអំពីការបញ្ជូនរថក្រោះទៅកាន់តំបន់ Al-Suwayda ដោយសង្កត់ធ្ងន់ថា នេះត្រូវបានធ្វើក្នុងគោលបំណងដើម្បីស្ដារសណ្តាប់ធ្នាប់ក្នុងអំឡុងពេលមានការប៉ះទង្គិចគ្នារវាងកងជីវពល Druze និងជនជាតិដើម Bedouins។

នាពេលមុននេះ បម្រាមគោចរ ត្រូវបានដាក់នៅក្នុងទីក្រុង Al-Suwayda ខណៈដែលកងកម្លាំងសន្តិសុខផ្ទៃក្នុង និងកងទ័ពស៊ីរី បានបណ្តេញកងកម្លាំងស្វ័យការពារចេញពីភាគកណ្តាលទីក្រុងនេះ។

ការប៉ះទង្គិចគ្នា បានផ្ទុះឡើងនៅទីក្រុង Al-Suwayda កាលពីថ្ងៃទី ១៣ ខែកក្កដា។ យោងតាមទិន្នន័យចុងក្រោយ ភាពចលាចលនេះ បានឆក់យកជីវិតមនុស្សយ៉ាងហោចណាស់អ្នកកាន់សាសនា Druzesចំនួន៤៦ នាក់ ជនជាតិដើម Bedouins ចំនួន ២៨នាក់ និងជនស៊ីវិល ៤ នាក់។ កងកម្លាំងរដ្ឋាភិបាលបានដាក់ពង្រាយទៅតំបន់នោះ ដើម្បីបញ្ឈប់ជម្លោះ ដែលបានបាត់បង់ទាហាន ១៨នាក់។