បាល់ទាត់៖ គណៈកម្មការប្រកួតបាល់ទាត់ជាតិកម្ពុជា (CNCC) បានបន្ដចេញនូវសេចក្ដីណែនាំថ្មីមួយទៀត ដល់បណ្ដាក្លិបដែលលេងក្របខណ្ឌលីគកំពូលកម្ពុជា និងពានរង្វាន់សម្ដេចតេជោ ហ៊ុន សែន ឆ្នាំ២០២១ នូវវិធានបន្ទាន់ក្នុងការទប់ស្កាត់ការរាតត្បាតនៃជំងឺកូវីដ-១៩ ក្នុងព្រឹត្តិការណ៍សហគមន៍ ២០កុម្ភៈ ខណៈជំងឺដ៏កាចសាហាវនេះកំពុងមានការរីករាលដាលខ្លាំង ក្នុងប្រទេសកម្ពុជានាពេលបច្ចុប្បន្ន។
ចំពោះសេចក្ដីណែនាំថ្មីដែល CNCC បន្ដធ្វើការក្រើនរំលឹកដល់បណ្ដាក្លិប និងក្រុមដែលចូលរួមព្រឹត្តិការណ៍បាល់ទាត់ថ្នាក់ជាតិធំៗទាំងពីរ គឺមាន ១១ចំណុចរួមមាន៖
១-មិនត្រូវអនុញ្ញាតិឲ្យមានទស្សនិកជន ចូលទស្សនាផ្ទាល់នៅកីឡដ្ឋាន និងបរិវេណក្នុងការប្រកួតរហូតដល់មានការជូនដំណឹងជាថ្មី។
២-ត្រូវធ្វើការតាមដានសុខុមាលភាព និងគ្រប់គ្រងឲ្យបានច្បាស់លាស់ និងយកចិត្តទុកនូវការអនុវត្តវិធានការសុវត្ថិភាពទៅលើមន្ដ្រីក្រុម និងកីឡាករគ្រប់រូបទាំងអស់ ក៏ដូចជាការប្រាស្រ័យទាក់ទង ការធ្វើដំណើរជាប្រចាំថ្ងៃរបស់ពួកគាត់ ជៀសវាងនូវហានិភ័យនៃការចម្លងជំងឺកូវីដ-១៩ ដោយផ្ទាល់ ឬប្រយោលជាមួយអ្នកជំងឺ ឬបុគ្គលដែលមានការសង្ស័យ និងទីកន្លែងដែលមានការឆ្លងចូលនូវជំងឺនេះផងដែរ។
៣-ក្នុងករណីមានការសង្ស័យលើមន្ដ្រីក្រុម ឬកីឡាកររបស់ក្រុម និងក្លិប ដោយមានអាការៈដូចជា៖ គ្រុនក្ដៅ ក្អក ឈឺបំពង់ក ពិបាកដកដង្ហើមជាដើម ដាច់ខាតត្រូវរាយការណ៍ជាបន្ទាន់ជូនគណៈកម្មការប្រកួតបាល់ទាត់ជាតិកម្ពុជា អាជ្ញាធរពាក់ព័ន្ធ និងក្រុមឆ្លើយតបបន្ទាប់តាមប្រព័ន្ធទូរស័ព្ទទាន់ហេតុការណ៍១១៥ ដោយមិនគិតថ្លៃ។
៤-ត្រូវតែបិទផ្ទាំងខិត្តប័ណ្ណធំៗអំពីវិធានសុវត្ថិភាព វិធានអនាម័យ ការលាងសម្ពាតដៃ និងសេចក្ដីណែនាំរបស់ក្រសួងសុខាភិបាល ពាក់ព័ន្ធនឹងជំងឺកូវីដ-១៩ នៅតាមគ្រប់បន្ទប់ និងច្រកចេញចូលទាំងអស់។
៥-បំពាក់ម៉ាស៊ីនវាស់កម្ដៅស្វ័យប្រវត្តិ ឬទែម៉ូម៉ែត្រវាស់កម្ដៅដោយដៃ និងអាល់កុល ឬជែលលាងដៃនៅគ្រប់ច្រកចូលនៃកីឡដ្ឋាន ដែលបើកប្រើប្រាស់ជាកំហិត។
៦-ក្រុមការងារ មន្ដ្រីក្រុម បុគ្គលិក និងបុគ្គលិកគ្រប់រូបត្រូវពាក់ម៉ាស់ និងរបាំងមុខការពារឲ្យបានត្រឹមត្រូវ និងជាប់ជាប្រចាំ។
៧-ត្រូវអនុវត្តការរក្សាគម្លាតសុវត្ថិភាពយ៉ាងតិច ១,៥ម៉ែត្រពីបុគ្គលម្នាក់ទៅបុគ្គលម្នាក់។
៨-កីឡដ្ឋានប្រកួតនីមួយៗត្រូវមានបង្គន់អនាម័យ និងកន្លែងលាងដៃគ្រប់គ្រាន់។
៩-ត្រូវចាត់តាំងសមាសភាពមន្ដ្រីរបស់ក្លិបចំនួន ១រូបចូលរួមជាសមាជិកគណៈកម្មការត្រួតពិនិត្យ ការប្រកួតកីឡាតាមក្លិបក្នុងបរិបទនៃជំងឺកូវីដ-១៩។
១០-មិនអនុញ្ញាតឲ្យបុគ្គលដែលមានកម្ដៅចាប់ពី ៣៧,៥អង្សារឡើងទៅ ឬជំងឺផ្ដាសាយ និងក្អកចូលក្នុងកីឡដ្ឋាន។
១១-ក្លិបកីឡាទាំងអស់ត្រូវអនុវត្តនូវខ្លឹមសារ និងវិធានលម្អិតណែនាំសុវត្ថិភាព ដើម្បីបង្ការជំងឺកូវីដ-១៩ ដែលបានភ្ជាប់ជូន។
នេះមិនមែនជាលើកទី១ នោះទេដែល CNCC បានចេញសេចក្ដីណែនាំបែបនេះ ពោលគឺមុនពានរង្វាន់សម្ដេចតេជោ ហ៊ុន សែន និងលីគកំពូលកម្ពុជាចាប់ផ្ដើមការប្រកួត ស្ថាប័នទទួលបន្ទុករៀបចំព្រឹត្តិការណ៍ទាំងពីរនេះ បានធ្វើការជូនដំណឹងជាបន្ដបន្ទាប់ អំពីវិធានការក្រសួងសុខាភិបាល ពិសេសវិធានការ ៣ការពារ និង ៣កុំ ដើម្បីទប់ស្កាត់ការរីករាលដាលជំងឺកូវីដ-១៩។ គួរបញ្ជាក់ថា បច្ចុប្បន្នស្ថានភាពជំងឺកូវីដ-១៩ នៅកម្ពុជាហាក់មិនទាន់ធូរស្រាលនោះទេ ផ្ទុយទៅវិញហាក់មានការរីករាលដាលខ្លាំង រហូតដល់បណ្ដាលខេត្តមួយចំនួន រួមទាំងវិស័យសិល្បៈទៀតផង ដែលសុទ្ធសឹងតែពាក់ព័ន្ធនឹងព្រឹត្តិការណ៍ ២០កុម្ភៈ៕
អត្ថបទ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
