មេធាវីរបស់លោក Thaksin Shinawatra (ថាក់ស៊ីន ស៊ីណាវ៉ាត់) នៅថ្ងៃពុធ (ទី១៦ ខែកក្កដា) នេះ បានប្រាប់ឲ្យដឹងថា អតីតនាយករដ្ឋមន្ត្រីថៃរូបនេះ នឹងស្ដាប់សាលក្រម ក្នុងសំណុំរឿងប្រមាថអង្គព្រះមហាក្សត្រ នៅថ្ងៃទី២២ ខែសីហា ដោយនេះគ្រាន់តែជាការចាប់ផ្ដើមដំបូងនៃបញ្ហាប្រឈមផ្លូវច្បាប់បន្តបន្ទាប់ ប្រឆាំងនឹងរូបលោក និងកូនស្រីរបស់លោក គឺនាយករដ្ឋមន្ត្រី លោកស្រី Paetongtarn Shinawatra (ផែថងថាន ស៊ីណាវ៉ាត់» ដែលតំណែងដឹកនាំរដ្ឋាភិបាលរបសលោកស្រីត្រូវបានព្យួរ។

ទោះបីជាលោក ថាក់ស៊ីន មិនមានតួនាទីផ្លូវការក្នុងរដ្ឋាភិបាលក៏ដោយ ប៉ុន្តែរូបលោកនៅតែមានឥទ្ធិពលខ្លាំង ហើយត្រូវបានគេមើលឃើញថា ជាអ្នកមានអំណាចនៅពីក្រោយគណបក្សកំពុងកាន់អំណាច គឺបក្ស Pheu Thai (ភឿថៃ) ដែលឥឡូវនេះ ត្រូវបានឡោមព័ទ្ធដោយបញ្ហាជាច្រើន ជាពិសេសការធ្លាក់ចុះសេដ្ឋកិច្ច។

យ៉ាងណាក្ដី មេធាវីរបស់លោក ថាក់ស៊ីន គឺលោក Winyat Chatmontree បានប្រាប់អ្នកសារព័ត៌មានថា៖ «យើងមានទំនុកចិត្តថា យើងនឹងទទួលបានយុត្តិធម៌»។

គួរបញ្ជាក់ថា ច្បាប់ប្រមាថព្រះមហាក្សត្ររបស់ប្រទេសថៃ គឺស្ថិតក្នុងចំណោមច្បាប់ដ៏តឹងរ៉ឹងបំផុតមួយរបស់ពិភពលោក ដោយកំណត់រយៈពេលជាប់ពន្ធនាគាររហូតដល់ ១៥ឆ្នាំ ចំពោះជនទាំងឡាយណាដែលត្រូវបានកាត់ទោសពីបទប្រមាថ ឬគំរាមកំហែងដល់ព្រះមហាក្សត្រ Maha Vajiralongkorn និងញាតិវង្សានុវង្សដ៏ជិតស្និទ្ធរបស់ព្រះអង្គ។

សម្រាប់លោក ថាក់ស៊ីន រូបលោកត្រូវប្រឈមនឹងករណីដាច់ដោយឡែកមួយទៀត ជុំវិញភាពស្របច្បាប់នៃការសម្រាកព្យាបាលនៅមន្ទីរពេទ្យដ៏យូររបស់លោក ពោលគឺជាករណីដែលក៏អាចបញ្ជូនលោកឲ្យវិលទៅរស់នៅក្នុងពន្ធនាគារវិញផងដែរ៕