​ហ្វីលីពីន៖ ប្រធានាធិបតី​ហ្វីលីពីន​លោក Rodrigo Duterte បាន​និយាយ​កាលពី​ថ្ងៃ​ព្រហស្បតិ៍​ថា មនុស្ស​ទាំង​ឡាយ​ណា​ដែល​មិនបាន​ចាក់​វ៉ាក់សាំង​បង្ការ​វីរុស COVID-19 នឹង​ត្រូវ​ចាប់ខ្លួន បើ​សិន​បើ​ពួកគេ​ល្មើស​នឹង​បញ្ជា​ឲ្យ​ស្នាក់នៅ​ក្នុង​ផ្ទះ ខណៈ​មាន​ការឆ្លង​ហក់​ឡើង​ខ្ពស់​រយៈពេល ​៣​ខែ​មកនេះ​។

​ថ្លែង​នៅលើ​កញ្ចក់​ទូរទស្សន៍​ជា​សារ​សម្រាប់​ប្រទេស​នេះ លោក Duterte បាន​និយាយថា លោក​កំពុង​ស្នើ​ដល់​បណ្ដា​មេដឹកនាំ​សហគមន៍ឲ្យ​ស្វែងរក​អ្នក​ដែល​មិនបាន​ចាក់​វ៉ាក់សាំង និង​ត្រូវធ្វើ​ឲ្យ​ប្រាកដ​ថា ពួកគេ​ទាំងនោះ​ត្រូវតែ​ស្ថិតនៅ​ក្នុងផ្ទះ​របស់ខ្លួន​។ លោក Duterte បាន​និយាយថា ប្រសិនបើអ្នក​ណាម្នាក់មិន​ព្រម​អនុវត្តន៍​តាម ប្រសិនបើអ្នកណាម្នាក់​ចាក​ចេញពីផ្ទះ ឬចេញចូល​ក្នុង​សហគមន៍នោះគេ​អាច​នឹង​ត្រូវបាន​ឃាត់ខ្លួន។ ប្រសិនបើ​គេ​នៅតែ​មិនព្រម ឬរឹងរូស​ត្រូវ​ចាប់ខ្លួន​តែម្ដងទៅ​។

​ក្រសួងសុខាភិបាល​ប្រទេស​នេះ​បាន​បញ្ជាក់ថា ករណី​ឆ្លង​វីរុស​កូ​រ៉ូ​ណាប្រចាំថ្ងៃ​នៅ​ហ្វីលីពីន​បាន​ហក់​ឡើង​ខ្ពស់បំផុតចាប់តាំងពី​ថ្ងៃទី​២៦​ខែកញ្ញា ដោយមាន​ករណី​ឆ្លង​ថ្មី​ចំនួន ១៧,២២០នាក់កាលពី​ថ្ងៃ​ព្រហស្បតិ៍​ម្សិលមិញ រួមទាំង​ករណី​ឆ្លង​វីរុស​ប​ម្លែ​ង​ខ្លួន​ថ្មី Omicron ផងដែរ​។ ប្រទេស​ហ្វីលីពីនមាន​ករណី​ឆ្លង​វីរុស​ COVID-19 សរុប​ចំនួន ២,៨៨៨,៩១៧​នាក់ និង​ស្លាប់​ចំនួន ៥១,៧៤៣នាក់ ជា​ប្រទេស​ដែលមាន​ករណី​ឆ្លង និង​ស្លាប់​ខ្ពស់បំផុត​ទី​២ នៅ​អាស៊ីអាគ្នេយ៍បន្ទាប់ពី​ប្រទេស​ឥណ្ឌូនេស៊ី​៕

អត្ថបទ៖ សុខមាន