នៅថ្ងៃពុធ (ទី១៦ ខែកក្កដា) នេះ សភាអ៊ុយក្រែនបានផ្តល់ការអនុម័តដំបូងរបស់ខ្លួន ចំពោះការចំណាយថវិកាបន្ថែមចំនួន ៩,៨ពាន់លានដុល្លារ សម្រាប់កងទ័ព និងវិស័យការពារជាតិ នៅឆ្នាំនេះ ខណៈដែលសង្រ្គាមប្រឆាំងនឹងរុស្ស៊ី បន្តមានដោយគ្មានសញ្ញាដល់ទីបញ្ចប់។

សមាជិកសភា និងក្រសួងហិរញ្ញវត្ថុ បានឲ្យដឹងថា សភាបានអនុម័តវិសោធនកម្មច្បាប់ថវិកា នៅក្នុងដំណាក់កាលដំបូង ដោយបង្កើនការចំណាយលើវិស័យការពារជាតិឆ្នាំ២០២៥ ចំនួន ៥៣,២ពាន់លានដុល្លារ ជាមួយនឹងចំនួនបន្ថែម ៩,៨ពាន់លានដុល្លារទៀត។

ក្រសួងហិរញ្ញវត្ថុបានឲ្យដឹងនៅក្នុងសេចក្តីថ្លែងការណ៍មួយថា៖ «តម្រូវការ ដើម្បីធ្វើវិសោធនកម្មច្បាប់ថវិការដ្ឋឆ្នាំ២០២៥ ត្រូវបានកំណត់ដោយតម្រូវការ ក្នុងការផ្តល់ឲ្យកងកម្លាំងការពារជាតិនូវអាវុធ គ្រាប់រំសេវ និងគ្រឿងយុទ្ធោបករណ៍»។ 

រដ្ឋាភិបាលគ្រោងនឹងបង្កើនមូលនិធិបន្ថែម ដោយការខ្ចីបបន្ថែមទៀតនៅលើទីផ្សារបំណុលក្នុងស្រុក។ ហើយក្រសួងហិរញ្ញវត្ថុ បានបន្ថែមថា ខ្លួនក៏រំពឹងផងដែរថា នឹងប្រមូលបានប្រាក់ចំណូលពន្ធខ្ពស់ បន្ទាប់ពីទីក្រុងគីវ កាលពីឆ្នាំមុន បានសម្រេចបង្កើនប្រភេទពន្ធផ្សេងៗ។

ក្រុមអ្នកវិភាគបានលើកឡើងថា ក្នុងពេលដែលកងកម្លាំងរុស្ស៊ីបន្តការវាយលុក នៅភាគខាងកើតអ៊ុយក្រែន ដោយដណ្ដើមកាន់កាប់ពីភូមិមួយទៅភូមិមួយ ក្នុងរយៈពេលជាច្រើនខែកន្លងមកនេះ ហើយការប៉ុនប៉ងចរចាសន្តិភាព មិនទទួលបានលទ្ធផល អ៊ុយក្រែន និងរុស្ស៊ីក៏ត្រូវបានជាប់នៅក្នុងការប្រកួតប្រជែងផ្នែកសេដ្ឋកិច្ចផងដែរ៕