ការស្ទង់មតិរបស់សារព័ត៌មានរ៉យទ័រ និងស្ថាប័នស្រាវជ្រាវ Ipsos ដែលបិទកាលពីថ្ងៃពុធ (១៦ កក្កដា) បានរកឃើញថា អត្រាគាំទ្រពីសាធារណជនអាមេរិក លើលោកប្រធានាធិបតី Donald Trump ទៅលើបញ្ហាអន្តោប្រវេសន៍ បានធ្លាក់ចុះយ៉ាងគំហុកក្នុងប៉ុន្មានសប្តាហ៍ថ្មីៗនេះមកនៅត្រឹម ៤១% ដែលជាកម្រិតទាបបំផុតចាប់តាំងពីការវិលត្រឡប់របស់លោកទៅកាន់សេតវិមានក្នុងអាណត្តិទី២ ខណៈប្រជាជនអាមេរិក មិនពេញចិត្តយុទ្ធសាស្ត្រប្រើដៃធ្ងន់របស់លោកលើជនអន្តោប្រវេសន៍នោះទេ។

តួលេខដូចគ្នានៃអ្នកឆ្លើយតបក្នុងការស្ទង់មតិរយៈពេលពីរថ្ងៃ -ពោលគឺ ៤១% ដដែលនេះ- បានបង្ហាញការយល់ស្របលើកិច្ចការជារួមរបស់លោក Trump ក្នុងឋានៈជាប្រធានាធិបតី ដោយត្រូវគ្នានឹងការស្ទង់មតិថ្ងៃទី២១-២៣ ខែមិថុនា ដែលក៏ជាកម្រិតទាបបំផុតនៃអាណត្តិទីពីររបស់លោករហូតមកដល់ពេលនេះ។ នៅក្នុងការស្ទង់មតិខែមិថុនានោះ អត្រាគាំទ្ររបស់លោក Trump លើអន្តោប្រវេសន៍ ធ្លាប់ឈរនៅកម្រិត ៤៣%។

ប្រធានាធិបតីមកពីបក្សសាធារណរដ្ឋរូបនេះ បានបញ្ជាឱ្យមានយុទ្ធនាការទូទាំងប្រទេសដើម្បីចាប់ខ្លួនជនអន្តោប្រវេសន៍ដែលរស់នៅសហរដ្ឋអាមេរិកដោយខុសច្បាប់ ហើយបានប្តេជ្ញានិរទេសមនុស្សរាប់លាននាក់ ដោយអនុវត្តការឆ្មក់បង្រ្កាបនៅកន្លែងធ្វើការ រួមទាំងកសិដ្ឋាន ដែលធ្លាប់ត្រូវលើកលែងយ៉ាងច្រើនអំឡុងពេលអាណត្តិដំបូងរបស់លោក។ ការឆ្មក់បង្រ្កាបមិនបន្ធូរដៃទាំងនោះបានបង្កឱ្យមានបណ្តឹងរាប់សិបករណី និងភាពចម្រូងចម្រាសយ៉ាងច្រើន។

មានតែអ្នកឆ្លើយតបការស្ទង់មតិ ២៨% ប៉ុណ្ណោះបាននិយាយថា ពួកគេយល់ស្របជាមួយនឹងឃ្លាថា "ការចាប់ខ្លួនជនអន្តោប្រវេសន៍នៅកន្លែងធ្វើការគឺល្អសម្រាប់ប្រទេស" បើធៀបនឹងអត្រា ៥៤% ដែលមិនយល់ស្រប។ សមាជិកបក្សសាធារណរដ្ឋបានខ្វែងគំនិតយ៉ាងជូរចត់លើរឿងនេះ ដោយមានអត្រា ៥៦% គាំទ្រការឆ្មក់បង្រ្កាបនៅកន្លែងធ្វើការ ហើយ ២៤% ជំទាស់ និងប្រហែលជា ២០% មិនប្រាកដចិត្ត។ ដោយឡែកខាងសមាជិកបក្សប្រជាធិបតេយ្យវិញគឺមិនយល់ស្របយ៉ាងច្រើនលើសលប់៕