លោកប្រធានាធិបតីអាមេរិក Donald Trump បាននិយាយនៅក្នុងបទសម្ភាសមួយកាលពីថ្ងៃពុធ (១៦ កក្កដា) ថា ទីក្រុងវ៉ាស៊ីនតោន កំពុងខិតជិតកិច្ចព្រមព្រៀងពាណិជ្ជកម្មជាមួយឥណ្ឌា ខណៈកិច្ចព្រមព្រៀងមួយក៏អាចឈានដល់ជាមួយអឺរ៉ុបផងដែរ ប៉ុន្តែភាពមិនច្បាស់លាស់នៅតែមានទាក់ទងនឹងកិច្ចព្រមព្រៀងជាមួយអ្នកជិតខាងកាណាដា ដែលកំពុងរងការគំរាមពន្ធថ្មីយ៉ាងខ្ពស់ដល់ទៅ ៣៥% ។

ដើម្បីជំរុញនូវអ្វីដែលលោក Trump ចាត់ទុកជាលក្ខខណ្ឌល្អប្រសើរជាមួយដៃគូពាណិជ្ជកម្ម និងវិធីកាត់បន្ថយឱនភាពពាណិជ្ជកម្មដ៏ធំរបស់អាមេរិក រដ្ឋបាលរបស់លោកបាននឹងកំពុងចរចាកិច្ចព្រមព្រៀងពាណិជ្ជកម្មជាច្រើន ឱ្យបានមុនកាលបរិច្ឆេទកំណត់ថ្ងៃទី០១ ខែសីហា ជាពេលដែលពន្ធលើការនាំចូលភាគច្រើនរបស់សហរដ្ឋអាមេរិក នឹងត្រូវកើនឡើងខ្ពស់ម្តងទៀត។

នៅពេលត្រូវសាកសួរថាតើកិច្ចព្រមព្រៀងពាណិជ្ជកម្មមួយណាដែលជិតកើតមាន លោក Trump បាននិយាយថា "ក្រុមមន្រ្តីកំពុងពិភាក្សាជិតស្និទ្ធិជាមួយឥណ្ឌា ហើយក៏អាចធ្វើកិច្ចព្រមព្រៀងជាមួយសហភាពអឺរ៉ុបផងដែរ"។ ទាក់ទងនឹងកិច្ចព្រមព្រៀងជាមួយកាណាដា ដែលជាអ្នកជិតខាងរបស់អាមេរិក ហើយក៏ដូចជាប្លុកអឺរ៉ុបផងដែរ គឺកំពុងត្រៀមវិធានការសងសឹកបើការពិភាក្សាពន្ធបរាជ័យ លោក Trump បានប្រាប់ថា "មិនទាន់អាចនិយាយបានទេ"។

ការអត្ថាធិប្បាយរបស់លោក Trump បានកើតឡើងនៅពេលលោក Maros Sefcovic ប្រធានពាណិជ្ជកម្មសហភាពអឺរ៉ុប ដែលរងការគំរាមពន្ធ ៣០% ធ្វើដំណើរទៅកាន់ទីក្រុងវ៉ាស៊ីនតោន កាលពីថ្ងៃពុធ សម្រាប់ការពិភាក្សាអំពីពន្ធ ខណៈគណៈប្រតិភូពាណិជ្ជកម្មឥណ្ឌា ដែលរងពន្ធគំរាម ២៦% បានទៅដល់ទីក្រុងវ៉ាស៊ីនតោន កាលពីថ្ងៃចន្ទ សម្រាប់កិច្ចពិភាក្សាថ្មីៗជាបន្តបន្ទាប់៕