មន្ត្រីជាន់ខ្ពស់មួយរូបរបស់អ៊ីស្រាអែលបាននិយាយកាលពីថ្ងៃពុធសប្ដាហ៍នេះថា កិច្ចព្រមព្រៀងចំណាប់ខ្មាំងរវាងអ៊ីស្រាអែល និងក្រុមហាម៉ាស ទំនងជិតសម្រេចបានហើយ ខណៈប្រភពពីរដែលពាក់ព័ន្ធនឹងកិច្ចខិតខំប្រឹងប្រែងសម្របសម្រួលបានប្រាប់សារព័ត៌មាន The Times of Israel ថា ឱកាសឈានដល់កិច្ចព្រមព្រៀងក្នុងរយៈពេលប៉ុន្មានថ្ងៃមកនេះ បានបើកបន្ទាប់ពីក្រុងហ្សេរុយសាឡឹមបានយល់ព្រមកាត់បន្ថយវត្តមានកម្លាំងរបស់ខ្លួនក្នុងតំបន់ហ្កាហ្សា អំឡុងពេលបទឈប់បាញ់រយៈពេល ៦០ ថ្ងៃដែលកំពុងពិភាក្សា។    

មន្ត្រីអ៊ីស្រាអែល បាននិយាយក្នុងសន្និសីទខ្លីមួយជាមួយអ្នកសារព័ត៌មានដោយសុំមិនបញ្ចេញឈ្មោះថា ខ្ញុំជឿថាកិច្ចព្រមព្រៀងមួយគឺអាចសម្រេចបាន វាមិនសាមញ្ញទេ។ ការចរចាជាមួយក្រុមហាម៉ាសមិនងាយស្រួល ឬប្រើពេលខ្លីនោះទេ ហើយខ្ញុំមិនអាចកំណត់ពេលវេលាបានទេ។

ការអត្ថាធិប្បាយរបស់មន្ត្រីអ៊ីស្រាអែលរូបនោះ បានបង្ហាញពីវិធានការសុទិដ្ឋិនិយម ស្របពេលមានការជំរុញថ្មីសម្រាប់បទឈប់បាញ់នៅហ្កាហ្សា ដែលនឹងមើលឃើញការវិលត្រឡប់មកវិញនៃចំណាប់ខ្មាំងអ៊ីស្រាអែលប្រហែលពាក់កណ្តាល។ ប្រធានាធិបតីអាមេរិក លោក Donald Trump ធ្វើជាម្ចាស់ផ្ទះ និងទទួលទានអាហារពេលល្ងាចកាលពីថ្ងៃពុធ ជាមួយនាយករដ្ឋមន្ត្រីនៃប្រទេសកាតា ជាទីដែលការចរចាកំពុងត្រូវបានធ្វើឡើង ក្នុងកិច្ចខិតខំប្រឹងប្រែងដើម្បីជំរុញកិច្ចព្រមព្រៀងមួយ។

ប៉ុន្មានម៉ោងមុនអាហារពេលល្ងាច លោក Trump បានប្រកាសក្នុងព្រឹត្តិការណ៍សេតវិមានថា "យើងមានព័ត៌មានល្អអំពីហ្កាហ្សា" ដោយពុំបានបញ្ជាក់លម្អិតបន្ថែម។ បេសកជនពិសេសរបស់សហរដ្ឋអាមេរិកប្រចាំតំបន់មជ្ឈិមបូព៌ា លោក Steve Witkoff ដែលមានវត្តមាននៅក្នុងព្រឹត្តិការណ៍នោះផងដែរ បានប្រាប់អ្នកសារព័ត៌មានថា កិច្ចពិភាក្សានៅទីក្រុង Doha កំពុងដំណើរការយ៉ាងល្អ។នៅសប្ដាហ៍នេះនេះដែរ លោក Trump បាននិយាយថា កិច្ចព្រមព្រៀងបទឈប់បាញ់អាចនឹងឈានដល់នៅសប្ដាហ៍នេះ៕