រដ្ឋមន្ត្រីការបរទេសអ៊ុយក្រែន លោក Andrii Sybiha បាននិយាយកាលពីថ្ងៃពុធ១៦ ខែកក្កដាសប្ដាហ៍នេះថា អ៊ុយក្រែនបានត្រៀមខ្លួនរួចជាស្រេចសម្រាប់កិច្ចចរចាសន្តិភាពបន្ថែមទៀតជាមួយរុស្ស៊ី ប៉ុន្តែពុំបានផ្តល់កាលបរិច្ឆេទជាក់លាក់ណាមួយឡើយ។ លោក Sybiha បានរំលឹកឡើងវិញនូវការអំពាវនាវរបស់ទីក្រុងគីវ (Kyiv) សម្រាប់ជំនួបរវាងមេដឹកនាំរុស្ស៊ី និងអ៊ុយក្រែន ដោយនិយាយថា នឹងជាជំហានដ៏មានប្រសិទ្ធភាពបំផុតក្នុងការជួយយល់ព្រមលើបទឈប់បាញ់។  

លោកបាននិយាយអំឡុងដំណើរទស្សនកិច្ចទៅកាន់ទីក្រុងឡាប្ល៊ីន(Lublin) ក្នុងប្រទេសប៉ូឡូញថា យើងត្រៀមខ្លួនរួចជាស្រេចសម្រាប់ការចរចាបែបនេះក្នុងទម្រង់ណាមួយ គ្រប់ភូមិសាស្ត្រ។

រដ្ឋមន្ត្រីការបរទេសលីទុយអានី លោក កេសទូទីស ប៊ើឌ្រីស (Kestutis Budrys) បានសង្កត់ធ្ងន់ថា អ៊ុយក្រែនបានយល់ព្រមរួចហើយចំពោះបទឈប់បាញ់ដោយគ្មានលក្ខខណ្ឌកាលពីបួនខែមុន ដោយបញ្ជាក់ថា មិនមែននៅខាងអ៊ុយក្រែនទេ គឺនៅខាងរុស្ស៊ី។

ក្រុមមន្ត្រីបានសម្តែងក្តីសង្ឃឹមសម្រាប់ការអនុវត្តទណ្ឌកម្មថ្មីប្រឆាំងនឹងរុស្ស៊ី ដោយលោក ប៊ើឌ្រីស បាននិយាយថា ពួកគេនឹងបន្តសម្របសម្រួលជាមួយដៃគូរបស់ខ្លួននៅសហរដ្ឋអាមេរិក ហើយចាប់ផ្តើមធ្វើការលើកញ្ចប់ទណ្ឌកម្មបន្ទាប់។ 

រុស្ស៊ីបានបង្កើនការវាយប្រហារលើទីក្រុងនានានៅទូទាំងប្រទេសអ៊ុយក្រែនក្នុងរដូវក្តៅនេះ ដោយបានបញ្ជូនយានដ្រូនជាច្រើនរយគ្រឿង អមដោយមីស៊ីលផ្លោង។ កងកម្លាំងអាកាសអ៊ុយក្រែនបាននិយាយថា វិមានក្រឹមឡាំងបានប្រើយានដ្រូន រយៈចម្ងាយឆ្ងាយ៤០០គ្រឿង និងបាញ់មីស៊ីលមួយគ្រាប់កាលពីយប់ថ្ងៃអង្គារសប្ដាហ៍នេះ ។ការវាយប្រហារជាបន្តបន្ទាប់ត្រូវបានធ្វើឡើងទន្ទឹមនឹងលោក Trump ក្នុងសប្ដាហ៍នេះបានកំណត់ពេលវេលា៥០ថ្ងៃឲ្យរុស្ស៊ីដើម្បីបញ្ចប់សង្គ្រាមអ៊ុយក្រែន និងការបន្តសម្រេចចិត្តរបស់លោកក្នុងការអនុម័តអាវុធបន្ថែមទៀតសម្រាប់អ៊ុយក្រែន រួមទាំងប្រព័ន្ធការពារដែនអាកាសផងដែរ៕