ទីបញ្ជាការកណ្តាលរបស់សហរដ្ឋអាមេរិក (CENTCOM) បាននិយាយនៅក្នុងការបង្ហោះមួយ នៅលើ     បណ្តាញសង្គម X កាលពីថ្ងៃពុធថា ក្រុមយោធាដែលគេស្គាល់ថា ជាកងកម្លាំងតស៊ូជាតិយេម៉ែន (NRF) បានរឹបអូសអាវុធអ៊ីរ៉ង់ដ៏ច្រើន ដែលត្រូវដឹកជញ្ជូនទៅឲ្យក្រុមសកម្មប្រយុទ្ធហ៊ួទី។

កងកម្លាំងតស៊ូជាតិយេម៉ែន (NRF) គឺជាកម្លាំងប្រឆាំងក្រុមហ៊ួទី នៅក្នុងប្រទេសយេម៉ែន ដឹកនាំដោយ លោក Tarek Saleh ជាក្មួយប្រុសរបស់អតីតប្រធានាធិបតីយេម៉ែនលោក Ali Abdullah Saleh ហើយមិនមែនជាផ្នែកផ្លូវការរបស់រដ្ឋាភិបាល ដែលទទួលស្គាល់ដោយអន្តរជាតិនោះទេ។

ទីបញ្ជាការកណ្តាលរបស់សហរដ្ឋអាមេរិក បានអះអាងថា កងកម្លាំងយេម៉ែន «រឹបអូសបានគ្រាប់រំសេវ និងគ្រឿងយុទ្ធោបករណ៍ផ្សេងទៀតជាង ៧៥០តោន ដែលរាប់បញ្ចូលទាំងមីស៊ីលតម្រង់គោលដៅ មីស៊ីលប្រឆាំងនាវា មីស៊ីលប្រឆាំងយន្តហោះ ក្បាលគ្រាប់ និងឧបករណ៍ចាប់សញ្ញាមីស៊ីល គ្រឿងបន្លាស់ ព្រមទាំងម៉ាស៊ីនយានដ្រូនរាប់រយគ្រឿង ឧបករណ៍ការពារដែនអាកាស ប្រព័ន្ធរ៉ាដា និងឧបករណ៍ទំនាក់ទំនងផងដែរ»។

ចាប់តាំងពីសង្រ្គាមរបស់អ៊ីស្រាអែលនៅតំបន់ហ្កាហ្សាប្រឆាំងនឹងក្រុមសកម្មប្រយុទ្ធប៉ាឡេស្ទីនហាម៉ាស បានចាប់ផ្តើម នៅក្នុងខែតុលា ឆ្នាំ ២០២៣ ក្រុមហ៊ួទីដែលគាំទ្រដោយអ៊ីរ៉ង់ បាននិងកំពុងវាយប្រហារនាវានៅសមុទ្រក្រហម ដែលជាអ្វីពួកគេនិយាយថា ជាសកម្មភាពនៃសាមគ្គីភាពជាមួយប្រជាជនប៉ាឡេស្ទីន។